زیاتر لە 300 کەس لە ئەفغانستان بەهۆی لافاوەوە گیانیان لەدەستدا

ئاڤا نیوز

لافاوێکی تووند باکووری ئەفغانستانی گرتووەتەوە و بەهۆیەوە زیاتر لە 300 کەس گیانیان لەدەستداوە، حکومەتی وڵاتەکەش باری نائاسایی ڕاگەیاندووە.

 

وێنە گەورەکە: بەهۆی ئەو شەپۆلی بارانبارینەی لە چەند ڕۆژی ڕابردوو ئەفغانستانی گرتووەتەوە، لافاوێکی گەورە لە چەند ناوچەیەکی وڵاتەکە دروستبووە و میدیاکانی ئەفغانستان دەڵێن، لە پارێزگای باغلان 311 کەس گیانیان لەدەستداوە، هەروەها 2011 ماڵ وێرانبوون و 2800 ماڵیش زیانیان بەرکەوتووە.

 

لێدوانی فەرمی: عەبدولمەتین قانی، گوتەبێژی وەزارەتی ناوخۆی ئەفغانستان ڕایگەیاند: ڕەنگە ژمارەی قوربانییەکان بەرزبێتەوە، چونکە هێشتا خەڵکێکی زۆر بێسەروشوێنن.

 

ئەوەی ئێستا ڕوودەدات: حکومەت باری نائاسایی ڕاگەیاندووە و سەرجەم تیمەکانی فریاگوزاری هەوڵدەدەن ئەوانەی گیریان خواردووە، ڕزگاریان بکەن.