پشکی وانەبێژان لە بودجەدا جێگیر دەکرێت

ئاڤا نیوز 

 

دوای ئەوەی وەزارەتی پەروەردەی هەرێمی کوردستان بە لیستێک ناوی وانەبێژانی ڕەوانەی بەغدا کرد، ئێستا هەنگاوێکی دیکەی گرتووەتەبەر و هەوڵ دەدات پشکی وانەبێژان لە بودجەی عێراق جێگیر بکات. 

 

بۆچی گرنگە؟ نزیکەی 37 هەزار وانەبێژ لە هەرێمی کوردستان هەن، بەگرێبەستکردنیان ڕێگە خۆش دەبێت تاوەکو دەرچووانی دانەمەزراو شوێنیان بگرنەوە، هەروەها ئەگەر بکرێنە گرێبەست، ئەوانەی بڕوانامەی بەکالۆریۆسیان هەیە، مووچەکەیان دەبێتە 500هەزار دینار و هەڵگرانی بڕوانامەی دیبلۆمیش، مووچەیان دەبێتە 450هەزار دینار.

 

لێدوانی فەرمی: د. ئالان حەمەسەعید بە ئاڤا نیوزی ڕاگەیاند، "بۆ جێگیرکردنی پشکی وانەبێژان لە بودجە، لەگەڵ د.شاخەوان عەبدوڵا، جێگری سەرۆکی ئەنجوومەنی نوێنەرانی عێراق لەسەر‌ هێڵین، گەشبینین بەوەی وانەبێژان بکرێنە گرێبەست".

 

لەلایەکی دیکەوە: د. نەهلە ئەفەندی، ئەندامی ئەنجوومەنی نوێنەرانی عێراق لە لیژنەی خوێندنی باڵا لەمبارەیەوە ڕایگەیاند: هەوڵ دەدەین پرسی بەگرێبەستکردنی وانەبێژان و بابەتی دامەزراندنی سێ یەکەمەکانی هەرێمی کوردستان بخەینە کارنامەی پەرلەمان، بۆ ئەوەی بتوانین پشکەکانیان لە بودجە جێگیر بکەین.