ئەمریکا سەرپەرشتی کۆبوونەوەی لایەنە کوردییەکانی ڕۆژئاوای کوردستان دەکات

ئاڤا نیوز  

نوێنەری وەزارەتی دەرەوەی ئەمریکا لە باکوور و ڕۆژهەڵاتی سووریا لە ماوەی 10 ڕۆژی ئایندە، سەرپەرشتی کۆبووەنەوەیەک بۆ لێکنزیکبوونەوەی لایەنە کوردییەکانی ڕۆژئاوای کوردستان دەکات.

وێنە گەورەکە: سکۆت بۆڵز، نوێنەری وەزارەتی دەرەوەی ئەمریکا لە باکوور و ڕۆژهەڵاتی سووریایە، هەنگاو بە ئاراستەی چارەسەری کێشەکانی نێوان لایەنە کوردییەکانی ڕۆژئاوای کوردستان دەستپێکردووە، سەرەتا بە تەنیا لەگەڵ ئەنەکەسە کۆدەبێتەوە.

ئەوەی پێویستە بیزانیت: دوای زیاتر لە دوو ساڵ  ئەمریکا لایەنەکانی ڕۆژئاوای کۆنەکردووەتەوە، ڕۆژ دوای ڕۆژ ئاڵۆزییەکانی نێوان ئەنجوومەنی نیشتمانی کوردی (ئەنەکەسە) و پارتی یەکێتیی دیموکراتی(پەیەدە) زیاتر دەبێت، لەلایەن پەیەدەوە بارەگاکانی ئەنەکەسە دەسووتێنرێن و ئەندامەکانی دەستگیردەکرێن.

لێدوانی فەرمی: ئیبراهیم برۆ، ئەندامی کۆمیتەی پەیوەندی دەرەوەی ئەنەکەسە بە ئاڤا نیوزی گوت:"ئەمریکا خواستی لێکنزیکبوونەوەی لایەنە کوردییەکانی هەیە، پێداگری لەسەر کۆتایی هاتنی کێشەکان دەکات، بەڵام زەمینەی دانیشتن نالەبارە و پەیەدە ڕێگرە لە لەیەکنزیکبوونەوە."