سوودانی: ناردنی مووچەی فەرمانبەرانی هەرێمی کوردستان بەردەوام دەبێت

ئاڤا نیوز

 

سەرۆکوەزیرانی عێراق دڵنیایی لە ناردنی مووچەی فەرمانبەرانی هەرێمی کوردستان دەدات و ڕایدەگەیێنێت، بە پشتبەستن بە بڕیاری دادگەی فیدراڵی ناردنی مووچە بەردەوام دەبێت.

 

چیرۆکی سەرەکی: یەکشەممە 19-5-2024، ئەنجوومەنی وەزیران بە سەرۆکایەتی محەممەد شیاع سوودانی، سەرۆکوەزیرانی عێراق کۆبووەوە. لە کۆبوونەوەکە خشتەکانی بودجەی گشتی فیدراڵی بۆ ساڵی 2024 پەسند کرا و ڕەوانەی ئەنجوومەنی نوێنەرانى کرا بۆ ئەوەی پەسەندی بکات.

 

لێدوانی ڕۆژنامەوانی: محەممەد شیاع سوودانی، لە کۆنگرەیەکی ڕۆژنامەوانیدا ڕایگەیاند: "داهاتی نانەوتی ڕادەست بکرێت یان نا، بە پشتبەستن بە بڕیاری دادگەی فیدراڵی مووچە دەنێردرێت".

 

زانیاریی زیاتر: سوودانی بە پێویستی زانی حکومەتی هەرێمی کوردستان "داهاتە نانەوتییەکانی ڕادەستی بەغدا بکات" و دەشڵێت: "ئێستا مووچەی فەرمانبەرانی هەرێمی کوردستان بەبێ گەڕانەوە بۆ پشکی هەرێمی کوردستان لە بودجە خەرج دەکرێت".

 

لەلایەکی دیکە: لەبارەی پرۆسەی بەبانکیکردنی مووچەی فەرمانبەران، سەرۆکوەزیرانی عێراق گوتی: "بانکی بازرگانیی عێراق - TBI دەستی بە بەبانکیکردن کردووە، بەڵام پێویستی بە کاتە تاوەکو تەواو دەبێت".