پارتی لەبارەی دوایین بڕیارەکانی کۆمیسیۆن لە کۆبوونەوەدایە

ئاڤا نیوز 

 

بە سەرپەرشتی سەرۆک بارزانی و ئامادەبوونی هەردوو جێگرەکەی، کۆمیتەی ناوەندیی پارتی دیموکراتی کوردستان بۆ تاوتوێکردنی هەڵبژاردن و دوایین بڕیارەکانی کۆمیسیۆنی هەڵبژاردنەکانی عێراق سەبارەت بە گەڕاندنەوەی کورسیی کۆتای پێکهاتەکان لە کۆبوونەوەدایە.

 

بۆچی گرنگە: چاوەڕوان دەکرێت کاتێکی نوێ بۆ هەڵبژاردن دیاری بکرێت و بەشێک لە داواکارییەکانی پارتی بۆ هەڵبژاردن لەبەرچاو گیراون، پارتیش ئامادەکاری دەکات. 

 

زانیاریی بەدەستهاتوو: تەوەرەکانی کۆبوونەوەکە لەسەر هەڵبژاردنی پەرلەمانی کوردستان و بڕیار و بەرنامەی پارتی دەبێت بۆ هەڵبژاردن، جگە لە بابەتی هەڵبژاردن پرسی پەیوەندییەکانی پارتی لەگەڵ لایەنە سیاسییەکانی هەرێمی کوردستان و پەیوەندییەکانی نێوان هەولێر و بەغداش گفتوگۆی لەبارەوە دەکرێت. 

زانیاریی زیاتر: تەوەری دیکەی کۆبوونەوەکە بابەتی گێڕانەوەی کورسیی کۆتا و هەڵبژاردن و چارەسەرکردنی گرفتی پەنجەمۆری دەنگدەرانە.

 

لەلایەکی دیکەوە: ڕۆژی 25-05-2024 مەکتەبی سیاسیی پارتی ڕایگەیاند، پشتیوانی کاراکردنەوەی پەرلەمانی کوردستان بە "ھەڵبژاردنێکی گەلپەسەند دەکەین کە پێویستی بە یەکڕیزی و یەکھەڵوێستیی نەتەوەیی و نیشتمانی ھەیە، ئەو یەکڕیزییەی کە پارتیمان زۆرترین نەرمیی لەپێناودا نواند".