وەزیری ئاوەدانکردنەوە: پردی ڕانیە – بنگرد کارئاسانی بۆ گواستنەوەی بەرهەمی جووتیاران دەکات

ئاڤا نیوز

وەزیری ئاوەدانکردنەوە و  نیشتەجێکردنی حکومەتی هەرێمی کوردستان ئاماژە بەوە دەدات، پردی ڕانیە – بنگرد کێشەی هاتووچۆی جووتیارانی بەری مەرگە چارەسەر دەكات.

وێنە گەورەکە: پڕۆژەی پردی ڕانیە – بنگرد یەکێکە لە پڕۆژە ستراتیژییەکانی کابینەی نۆیەمی حکومەتی هەرێمی کوردستان لە ئیدارەی ڕاپەڕین، سوود بە کەرتەکانی بازرگانی، گەشتیاریی، کشتوکاڵی دەگەیێنێت و کارئاسانی هاتووچۆ بۆ جووتیارانی ناوچەکە دەکات.

لێدوانی فەرمی: دانا عەبدولکەریم، وەزیری ئاوەدانکردنەوە و نیشتەجێکردنی هەرێمی کوردستان ڕایگەیاند: "سەرەڕای ئەوەی ئەم پردە سوودی بۆ سەلامەتیی هاووڵاتییان هەیە، گرنگییەکی دیکەی سوودوەرگرتنی جووتیارانە بۆ گواستنەوەی بەرهەمەکانیان".

بۆچی گرنگە: پێشتر بەشی زۆری جووتیارانی بەری مەرگە نەیاندەتوانی بەرهەمەکانیان بهێننە سنووری ئیدارە ڕاپەڕین، دەبوایە بیبەنە قەزای دووکان و لەوێوە بیگوازنەوە بۆ ڕانیە، بە تەواوکردنی پڕۆژەکە ئەو کێشەیان چارەسەر دەبێت.