لاریجانی خۆی بۆ سەرۆککۆماری ئێران بەربژێر کرد

ئاڤا نیوز

دوو ڕۆژە دەرگای خۆپاڵاوتن بۆ بەربژێربوون بۆ سەرۆککۆماری ئێران کراوەتەوە و تا سێ ڕۆژی دیکەش بەردەوام دەبێت، تا ئێستا چەندین کەس لە ناویشیاندا عەلی لاریجانی ناوی خۆی تۆمار کردووە. 

وێنە گەورەکە: لاریجانی، تەمەن 67 ساڵ، لەدایکبووی نەجەفە، هەڵگری بڕوانامەی دکتۆرایە لە فەلسەفە، سەرۆکی پێشووی پەرلەمانی ئێرانە، ڕاوێژکاری ڕێبەری باڵا و ئەندامی ئەنجوومەنی دەستنیشانکردنی بەرژەوەندییەکانی ئێرانە.دوو جاری دیکە خۆی بۆ سەرۆکایەتیی کۆمار بەربژێر کردووە؛ جارێک لە ناو حەوت بەربژێردا شەشەم بوو و جارێکیش ئەنجوومەنی چاودێری شایستەیی ڕەتی کردەوە. 

زانیاریی زیاتر: تا ئێستا، هەر یەکە لە سەعید جەلیلی، مەحموود ئەحمەدیی بێغەش، محەممەد خۆش چیهرە، عەبدولناسر هیمەتی، موحسین کەواکیبیان، محەممەد ڕەزا سەباغیان بافقی، عەباس موقتەدایی و قودرەتعەلی حیشمەتیان ناوی خۆیان تۆمار کردووە.

ئەوەی پێویستە بیزانیت: دوای تۆمارکردنی ناوەکان، پێویستە ئەنجوومەنی چاودێریی پەسەندیان بکات تا ببنە بەربژێر. 

باکگراوند:دوای گیانلەدەستدانی ئیبراهیم ڕەئیسی، سەرۆککۆماری ئێران، بە هۆی کەوتنەخوارەوەی هێلیکۆپتەرەکەی لە ڕۆژی 19-5-2024، بڕیار لە سەر هەڵبژاردنی پێشوەختە لە ڕۆژی 28ـی حوزەیرانی ئەمساڵ درا.