پارتی لەبارەی بەشداریکردن لە هەڵبژاردن بڕیار دەدات

ئاڤا نیوز

 

ئەندامێکی کۆمیتەی ناوەندیی پارتی دیموکراتی کوردستان ڕایگەیاند، پارتی ڕەزامەندیی سەرەتایی داوە بۆ ئەوەی لیستی خۆی بۆ هەڵبژاردن تۆمار بکات.

 

وێنە گەورەکە: کۆمیسیۆنی باڵای سەربەخۆی هەڵبژاردنەکانی عێراق ماوەی تۆمارکردنی لیستەکانی تاوەکو ڕۆژی 13-06-2024 دیاری کردووە، بۆ ئەوەی ئەو لایەنانەی لیستیان تۆمار نەکردووە دەرفەتیان هەبێت.

 

بۆچی گرنگە: پارتی، گەورەترین هێزی سیاسیی کوردستانە و هەڵبژاردنیش بەبێ گەورەترین هێزی سیاسیی کوردستان و عێراق وەک دەگوترێت "سەرکەوتوو نابێت".

 

لێدوانی فەرمی: ئەشواق جاف، ئەندامی کۆمیتەی ناوەندیی پارتی بە ئاڤا نیوزی گوت: تا ڕادەیەک کاری باش لەسەر تێبینییەکانمان کراوە، بە شێوەیەکی سەرەتایی بڕیارە بەشداریی هەڵبژاردن  بکەین و لیستیش تۆمار دەکەین، بەڵام ئەم بڕیارە دەبێت بە شێوەیەکی فەرمی مەکتەبی سیاسیی ڕایبگەیەنێت.

 

ئەوەی پێویستە بیزانیت: سەرۆکایەتیی هەرێمی کوردستان لەگەڵ لایەنە سیاسییەکان گفتوگۆ دەکات و وادەیەک بۆ هەڵبژاردنی کوردستان دیاری دەکات، پێشبینییەکان بەو ئاراستەیەن مانگی 10 ئەمساڵ هەڵبژاردن بکرێت.