بەغدا بەخێرایی شایستەی دارایی جووتیارانی هەرێم خەرج دەکات

ئاڤا نیوز

 

وەزارەتی بازرگانیی عێراق ڕایگەیاند، پرۆسەی وەرگرتنی گەنمی جووتیاران لە پارێزگاکانی هەرێمی کوردستان بەخێرایی بەڕێوەدەچێت و ئێمەش شایستە داراییەکان بە خێرایی دەنێرین.

 

وێنە گەورەکە: چاوەڕوان دەکرێت ئەمساڵ بەرهەمی گەنمی جووتیارانی هەرێمی کوردستان بەراورد بە ساڵی ڕابردوو زیاتر بێت، وەزارەتی بازرگانیی حکومەتی عێراقیش بڕیاریداوە، تەنیا 700 هەزار تۆن لە بەرهەمی گەنمی جووتیارانی هەرێم وەربگرێت.

 

ڕاگەیێنراوی فەرمی: وەزارەتی بازرگانیی حکومەتی عێراق، ئەمڕۆ شەممە ڕایگەیاند:"پابەندی ڕێنماییەکانی پێشووین سەبارەت بە وەرگرتنی گەنم و پێدانی شایستە داراییەکانی جووتیارانی هەرێمی کوردستان بە شێوەیەکی خێرا. پرۆسەی وەرگرتنی گەنمیش تا ئێستا لە پارێزگاکانی هەولێر، سلێمانی و دهۆک بە سەرکەوتوویی بەڕێوەدەچێت".

 

ئەوەی پێویستە بیزانیت: تا ئێستا بەغدا تەنیا پێنج ملیار دیناری لە شایستەی دارایی گەنمی جووتیارانی هەرێمی کوردستان ناردووە، بڕیارە لە چەند ڕۆژی داهاتوودا 20 ملیار دیناری دیکە بنێرێت.

 

باکگراوند: ڕۆژی 6-6-2024، دەرگەی 10 سایلۆ و چەند بنکەیەک بۆ وەرگرتنی گەنم لە شارەکانی هەرێمی کوردستان کرانەوە، بەگوێرەی ڕێککەوتنی نێوان هەولێر و بەغدا، هەر تۆنێکی گەنم بە 850 هەزار دینار وەردەگیرێت.