زیاتر لە 200 تۆڕی بازرگانی ماددەی هۆشبەر لە عێراق هەڵوەشێنراوەتەوە

ئاڤا نیوز 

 

وەزارەتی ناوخۆی عێراق ڕایگەیاند، لە ماوەی دوو ساڵدا زیاتر لە 200 تۆڕی بازرگانیی ماددەی هۆشبەری هەڵوەشاندووەتەوە.

 

وێنە گەورەکە: عێراق بووەتە گۆڕەپانی بازرگانانی ماددەی هۆشبەر و کارتێکەرە دەروونییەکان و چەندین تۆڕی خۆماڵی و نێودەوڵەتی کاری کڕین و فرۆشتن بەو ماددانە دەکەن، هێزە ئەمنییەکانیش بە هەزاران تۆمەتباریان دەستگیر کردووە.

 

ڕاگەیێنراوی فەرمی: میقداد میری، گوتەبێژی وەزارەتی ناوخۆی عێراق ڕایگەیاند: "لە سەرەتای ئەمساڵەوە دەستمان بەسەر تۆن و نیوێك ماددە هۆشبەرەکان دا گرتووە و لە ماوەی دوو ساڵی ڕابردووشدا 20 تۆڕی نێودەوڵەتی و 204 تۆڕی خۆماڵی ماددە هۆشبەرەکان هەڵوەشێنراونەتەوە".

 

ئەوەی پێویستە بیزانیت: لە عێراق تەنیا لەمساڵدا 60 تۆمەتباری ماددە هۆشبەر لە سێدارە دراون، و نزیکەی چوارهەزار کەس بە تۆمەتی ئەو ماددانە دەستگیر کراون.