لە کەنداوی عەدەن بەلەمێک ژێرئاو دەکەوێت

ئاڤا نیوز

 

بەلەمێک کە کۆچبەرانی هەڵگرتبوو لە کەناراوەکانی یەمەن نوقم بوو، بەهۆیەوە لانیکەم 49 کەس گیانیان لەدەستدا و 140 کەسی دیکەش بێسەروشوێن بوون.

 

ڕاگەیێنراوی فەرمی: ڕێکخراوی کۆچی نێودەوڵەتیی نەتەوە یەکگرتووەکان ڕایگەیاند: "بەلەمەکە نزیکەی 260 هاووڵاتیی سۆماڵی و ئەسیوپی لە کەناراوەکانی باکووری سۆماڵەوە هەڵگرتبوو و بەدرێژایی 320 کیلۆمەتر بە کەنداوی عەدەندا تێپەڕیوە، لە کەنارەکانی باشووری یەمەن نوقم بوو".

 

ئەوەی پێویستە بیزانیت: هەوڵەکانی گەڕان بەردەوامن و تاوەکو ئێستا 71 کەس ڕزگارکراون و 49 کەسیش گیانیان لەدەستداوە، لەنێویاندا 31 ئافرەت و منداڵ هەن.

 

ژمارەکان وادەڵێن: 380 هەزار کۆچبەر لە یەمەن هەن، ژمارەی ئەو کۆچبەرانەی ساڵانە لە ساڵی 2021 بۆ 2023 سێ هێندە زیادی کردووە، لە 27 هەزارەوە بۆ زیاتر لە 90 هەزار کەس بەرزبووەتەوە.

 

چارەسەرەکان: ئەو ڕێکخراوە پێیوایە، دەبێت پەلە بکرێت بۆ چارەسەرکردنی ئاستەنگەکانی کۆچکردن، دڵنیابوون لە سەلامەتی و ئاسایشی کۆچبەران بەدرێژایی ڕێگەکانی کۆچکردن.