ئەمڕۆ لە یۆرۆ؛ پۆرتوگال تاقیکردنەوەیەکی قورسی دەکات

ئاڤا نیوز 

 

گەڕی دووەمی قۆناغی کۆمەڵەکانی یۆرۆی 2024 بەردەوامە، پۆرتوگال و تورکیا کێبڕکێی بلیتێکی دیکەی قۆناغی 16 دەکەن، کریستیانۆ ڕۆناڵدۆش وێڵی یەکەم گۆڵیەتی لە تۆڕی تورکەکان.

 

وێنە گەورەکە: ئەڵمانیا و ئیسپانیا بلیتی قۆناغی 16ـی یۆرۆیان مسۆگەر و پۆڵەنداش ماڵئاوایی لە پاڵەوانێتیەکە کردووە، ئەمڕۆ پۆرتوگال، تورکیا و ڕۆمانیا  لەسەر بەدەستهێنانی ئەو قۆناغە کێبڕکێ دەکەن.

 

شێوازی جێبەجێکردن: کاتژمێر 4:00 لە یاریگەی ڤۆڵکسپاڕک ستادیۆم، هەڵبژاردەی چیک و جۆرجیا لە پێناو بەردەوامبوون لە پاڵەوانێتییەکە بەیەک دەگەن، ئەمە یەکەم ڕووبەڕووبوونەوەی فەرمی نێوان هەردوو هەڵبژاردە دەبێت.

 

یاریی گرنگ: ئەو یارییەی کە زۆرترین هاندەر لە دەوری خۆی کۆدەکاتەوە، ڕووبەڕووبوونەوەی پۆرتوگال و تورکیایە لەسەر یاریگەی سیگناڵ ئیدۆن پاڕک، کە شەڕ لەسەر پارێزگاریکردن لە پێگەی یەکەمی کۆمەڵەکە و مسۆگەرکردنی بلیتێکی دیکەی قۆناغی داهاتوو دەکەن.

 

زانیاریی زیاتر: پۆرتوگال لە مێژوو 7 یاری لە تورکیا بردووەتەوە و تورکیاش دوو بردنەوەی تۆمار کردووە، ئەوەی جێگەی سەرنجە تاوەکو ئێستا ڕۆناڵدۆ هیچ گۆڵێکی لە تۆڕی تورکیا نەکردووە.

 

لێدوانی فەرمی: چێنەر عەبدولقادر، بەڕێوەبەری ئاڤا سپۆڕت لە ئەڵمانیایە و گوتی، "ئەمشەو لە یاریی نێوان پۆرتوگال و تورکیا ئامادە دەبم، لە نزیکەوە ڤیدیۆی کریستیانۆ و ئەستێرەکانی دیکە بۆ هەوادارانی وەرزشی لە کوردستان تۆمار دەکەم، لە کاتژمێر 08:55ـی شەو بە شێوەی ڕاستەوخۆ لە کەناڵ و پەیجی ئاڤا سپۆرت شرۆڤەی یارییەکە دەکەم".

 

لەلایەکی دیکەوە: کاتژمێر 10:00ـی شەو لەسەر یاریگەی ڕین ئینەرجی ستادیۆم، ڕۆمانیا بۆ بەردەوامیدان بە سوپرایزەکانی و بەلجیکا بۆ قەرەبووی شکستی گەڕی یەکەم ڕووبەڕوو دەبنەوە.