پاشا نەخۆشە، كێ كۆشكی شاهانە بەڕێوەدەبات؟

ئاڤا دیجیتاڵ

كۆشكی شاهانەی بەریتانیا تووشبوونی شا چارلزی بە نەخۆشیی شێرپەنجە ڕاگەیاند، شازادە ویلیامی جێنشین لەمەودوا کاروباری کۆشک بەڕێوەدەبات. 

زانیارییە بەدەستهاتووەکان: کۆشکی باکینگهام ڕایگەیاند، شا چارڵز جۆرێکی شێرپەنجەی هەیە و پرۆستات نییە، بەڵام دیاریشی نەکردووە کام جۆری شێرپەنجەیە. "شا دەستی بە چارەسەری ئاسایی کردووە و ئەرکە گشتییەکان جێبەجێ ناكات".

چاوەڕوانکراو: لەمەودوا شازادە ویلیام، کە کوڕە گەورەی شا چارلز و شازادەی جێنشینە کاروباری کۆشک بەڕێوەدەبات و لە سبەیەوە چالاکییەکانی دەستپێدەکات.

ئەمەش بزانە: ساڵی 2020 بەهۆی کێشەی خێزانییەوە شازادە هاری، کوڕە بچووکی شا کۆشکی بەجێهێشت و لەوکاتەوە پەیوەندییەکی ساردی لەگەڵ خێزانە شاهانەییەکەی هەیە، بەڵام بڕیارە لە چەند ڕۆژی داهاتوودا لە کالیفۆرنیاوە بگەڕێتەوە بەریتانیا. هەرچەندە هێشتا میدیاکانی بەریتانیا دەڵێن ناکۆکی هەیە و مێگانی هاوژینی بەو گەڕانەوەیە ڕازی نییە.

ئەوەی لەو بارەیەوە دەگوترێت: لاپەڕەی یەکەمی رۆژنامە، گۆڤار و ماڵپەڕەکانی بەریتانیا تەرخانکراون بۆ هەواڵی تەندروستیی پاشا.

ڕۆژنامەی میرۆ: من شێرپەنجەم هەیە

زە سەن: ئەم ڕۆژانەی دوایی كە پاشا چووەتە نەخۆشخانە بۆ چارەسەری پڕۆستاتەكەی بووە

ڕۆژنامەی تایمز: تەندروستیی پاشا ئەرێنییە

ڕۆژنامەی ئێكسپرێس: هاری لە چەند ڕۆژی داهاتوودا باوكی دەبینێت

ڕۆژنامەی گاردیان: چارلز لە كۆشك نییە

ڕۆژنامەی تەلەگراف: پاشا چاوەڕێی كوڕەكەیەتی

دەیلی مەیڵ: پاشا زۆر سوپاسگوزارە