ئەو ناوچانەی بۆشایی ئەمنییان هەیە بە هێزی هاوبەش پڕدەکرێنەوە

ئاڤا نیوز

نوێنەری حکومەتی هەرێمی کوردستان ڕایگەیاند، ئەو ناوچانەی بۆشایی ئەمنییان تێدا هەیە بە هێزی هاوبەش پڕدەکرێنەوە و دوو لیوای تایبەت بۆ ئەو بەمەستە پێکهێنراون.

وێنە گەورەکە: بۆشاییەکی ئەمنی گەورە لە چەند ناوچەی نێوان حکومەتی عێراق و هەرێمی کوردستان هەیە، چەندینجار گفتوگۆ لەنێوان هەردوولادا کراوە بۆ ئەوەی بە هێزی هاوبەش پڕبکرێنەوە.

بۆچی گرنگە: بوونی ئەو بۆشاییە، هۆکارە کە هەندێک جار داعش هێرش و جموجوڵ تێیدا دەکەن، بەم هەنگاوە ئەو بۆشاییانەی کە هەیە پڕدەکرێنەوە و سەقامگیری تەواو دێتە کایەوە.

لێدوانی فەرمی: لیوا عەبدولخالق تەڵعەت، نوێنەری هەرێمی کوردستان لە فەرماندەیی هێزە هاوبەشەکانی عێراق بە ئاڤا نیوزی گوت: ئێستا دوو لیوای هاوبەش پێکهێنراون و ئامادەن کە ژمارەی هەردووکیان نزیکەی حەوت هەزار سەرباز دەبێت.

زانیاریی زیاتر: لیوای یەک پێکهاتەکەی زیاتر عەرەب و لیوای دووش بەشی زۆری کوردن، تەنیا ئەوە ماوە دابەشبکرێن بەسەر ئەو ناوچانەی بۆشایی ئەمنییان هەیە و لە خانەقین تاوەکو چیای قەرەچووخ لە قەزای مەخموور بڵاودەکرێنەوە.