سەرۆکایەتیی کۆمار دەستلەکارکێشانەوەی ژمارەیەک ڕاوێژکار و شارەزا ڕەت دەکاتەوە

ئاڤا نیوز

 

میدیای عێراقی ئاماژە بە دەستلەکارکێشانەوەی ڕاوێژکارێکی ئەمنی و پێنج شارەزا لە سەرۆکایەتیی کۆماری عێراق دەکەن، بەرپرسی پەیوەندییەکانی سەرۆکایەتیی کۆماریش هەواڵەکە ڕەت دەکاتەوە.

زانیاریی بەدەستهاتوو: میدیای عێراقی لەسەر زاری سەرچاوەیەکی ئەمنی ئاشکرای کردووە، پێنج شارەزا و ڕاوێژکارێکی ئەمنی لە سەرۆکایەتیی کۆمار دەستلەکارکێشانەوەی خۆیان پێشکەش بە د.لەتیف ڕەشید، سەرۆککۆماری عێراق کردووە، بەبێ ئاماژەکردن بە هیچ هۆکارێک.

 

لێدوانی فەرمی: سەرچاوەیەکی ئاگادار لە سەرۆکایەتیی کۆمار بە ئاڤا نیوزی گوت: "هەواڵەکە ڕاستە و سەرۆکایەتیی کۆمار خەریکی تاوتوێکردنی ئەو بابەتەیە، بەڵام هێشتا یەکلا نەکراوەتەوە".

 

بۆچوونی بەرامبەر: هاوڕێ تۆفیق، بەرپرسی پەیوەندییەکانی سەرۆکایەتیی کۆماری عێراق بە ئاڤا نیوزی گوت: بڵاوبوونەوەی ئەو هەواڵە سەرلەبەری ناڕاستە و هیچ بنەمایەکی نییە. دواتریش لە ڕاگەیێنراوێکدا سەرۆکایەتی کۆمار بەفەرمی هەواڵەکەی ڕەتکردەوە.