ئایا ڕووداوەکانی سووتاندنی پووش و پاوان بەئەنقەستن؟

ئاڤا نیوز

هێشتا ئاماری ڕووداوەکانی ئاگرکەوتنەوەی پووش و پاوان ڕانەگەیەنراوە، بەڵام مەزەندە دەکرێت ئەمساڵ بە هەزاران دۆنم زەوی سووتابن، بەڕێوەبەرێک دەڵێت: بەشێکی زۆری ئەو ڕووداوانە بەئەنقەستن.

وێنە گەورەکە: ساڵانە دوای وەرزی دروێنەکردن ڕووداوەکانی ئاگرکەوتنەوە لە پووش و پاوان زیاد دەکات، بەشێک لەو ڕووداوانە دەبن بە هۆکاری زیانگەیاندن بە بەروبومی کشتوکاڵی و ئاژەڵان.

لێدوانی فەرمی: تارق حەمە غەریب، بەڕێوەبەری دارستان و پاوانی سلێمانی بە ئاڤا نیوزی گوت: بەگوێرەی بەدواداچوونی ئێمە بەشی هەرە زۆری ئەو ئاگرانەی لە پووش و پاوان دروست دەبن لەلایەن جوتیارەکانەوەیە، لەو باوەڕەن ئەگەر ئەو پووشە ئاگر بدەن پاشماوەکەی بۆ خاک بەسوودە، بەڵام زیانەکانی زیاترن لە سوودەکانی.

زانیاریی زیاتر:  ئەو بەڕێوەبەرە دەڵێت: مانەوەی پووش و پەڵاش لەسەر خاک، پارێزگاری لە پلەی گەرمی خاک دەکات و ڕادەی شێی خاک دەپارێزێت، هەبوونی پاشماوەی سووتاوی پووش پلەی PH و ڕێژەی تفتی خاک زیاد دەکات.

لەلایەکی دیکەوە: سەرکەوت کاڕەش، گوتەبێژی بەڕێوەبەرایەتیی گشتیی بەرگریی شارستانیی هەرێم بۆ ئاڤا نیوز گوتی: بەشێکی بەرچاوی ئەو ئاگرانە لەلایەن جووتیارەکان خۆیان دەکرێتەوە بە بیانووی بەهێزی خاک، ڕێنمایی بەرگریی شارستانی ئەوەیە ناوبڕ بۆ ئەو زەوییانە دروست بکرێت، بەڵام بەدەگمەن هەن ئەو جێبەجێ بکەن.