تۆمەتبارێک بە 35 کیلۆ ماددەی هۆشبەر دەستگیرکرا

ئاڤا نیوز

بەڕێوەبەرایەتی نەهێشتنی ماددە هۆشبەرەکان ڕایەگەیاند، لەپارێزگای دهۆک توانیویانە دەستبگرن بەسەر 35 کیلۆ مادەی هۆشبەر لە جۆری کریستاڵ و تۆمەتبارێکیش دەستگیربکەن.

وێنە گەورەکە: چەند ساڵێکە بەشێک لە وڵاتانی دراوسێ بوونەتە سەنتەری بەرهەمهێنانی ماددەی هۆشبەر جۆری کەپتاگۆن لە سووریا و کریستاڵ لە ئێران بەرهەمدەهێنرێن.

لێدوانی فەرمی: نەقیب ئەرکان بیبانی، لە بەڕێوەبەرایەتیی گشتی نەهێشتنی ماددە هۆشبەرەکان بە ئاڤا نیوزی ڕاگەیاند: لەماوەی ڕابردوودا بەشێوەیەکی بەرچاو دەستگیراوە بەسەر مادەی کریستاڵ، ئەمەش لەبەرئەوەی هێزی ماددەکە کاریگەری زیاترە و ئەو کەسەی بەکارهێنەری ماددەکانی دیکەی هۆشبەرە، دوای بەکارهێنانی کریستاڵ ناتوانێت واز لەو مادەیە بهێنێت.

ئەوەی پێویستە بیزانیت: بەشێکی زۆری ئەو ماددە هۆشبەرانەی لەشاری هەولێر و دهۆک دەستیانبەسەردا دەگیرێت یان لە خوارووی عێراق هاتوون، یانیش لە ئێرانەوە هاتوونەتە ناو هەرێمی کوردستان.

باکگراوند: لە ماوەی شەش مانگی ئەمساڵدا، بەڕێوەبەرایەتی نەهێشتنی ماددە هۆشبەرەکان دەستیگرتووە بەسەر 108 کیلۆ و 133 گرام ماددەی هۆشبەر و نزیکەی 29 هەزار شیت حەبی هۆشبەر، هاوکات 868 تۆمەتباریش دەستگیرکراون، لەو ژمارەیە 461 تۆمەتباریان بازرگان بوون.