هیوا ئه‌حمه‌د: کردەوە تیرۆرستییەکەی کەلار په‌یامێكی مه‌ترسیداره‌

ئاڤا نیوز

به‌رپرسی مه‌کته‌بی ڕێکخستنی که‌رکووک – گه‌رمیانی پارتی، سه‌ردانی لقی 22ی گه‌رمیانی کرد و ڕایگه‌یاند تەقینەوەکەی کەلار بۆ تیرۆرکردنی به‌رپرسی لقی پارتی و هه‌ڤاڵانی بوو، داوایان کردووە ئەنجامدەرانی ئەو کردەوە  ئاشکرا بکرێن.

وێنە گەورەکە: دوێنێ 15-07-2024، ئۆتۆمبێلەکەی ئەکرەم ساڵح، بەرپرسی لقی 22ـی پارتی لە کەلار تەقییەوە، خۆی و شۆفێرەکەی و پاسەوانێکی بەسووکی بریندار بوون.

لێدوانی فەرمی: هیوا ئه‌حمه‌د مسته‌فا، به‌رپرسی مه‌کته‌بی ڕێکخستنی که‌رکووک – گه‌رمیانی پارتی،  له‌ کۆنگره‌یه‌کی ڕۆژنامه‌وانیدا، گوتی: "ئه‌وەی کراوه‌، کارێکی تیرۆرستییه ‌و بۆ تیرۆرکردنی ئه‌کره‌م ساڵح و هه‌ڤاڵه‌کانی بوو، ئه‌مه‌ په‌یامێکی مه‌ترسیداره‌، پێمان‌ وایه ‌ده‌ڤه‌ره‌که‌ ئارامه‌ و پێویستی به‌ که‌شی زیاتری ئارامی هه‌یه‌، ئه‌م کرده‌وانه‌ ترسنۆکانه‌ و  قێزه‌ونن و خه‌ڵک ڕقی لێ ده‌بێته‌وه"‌.

زانیاریی زیاتر: "داوامان لە لایەنە پەیوەندیدارەکان کردووه‌ هه‌موو هه‌وڵی خۆیان بده‌ن بۆ ئه‌وه‌ی لێکۆڵینه‌وه‌کان جددیه‌تی تێدا بێت، چاوه‌ڕوانی ئه‌وه‌ین ئه‌نجامێکی باش بدرێت به‌ده‌سته‌وه‌ و ئه‌وانه‌ی ئه‌م تاوانه‌یان کردووه‌  ئاشکرا بکرێن و بدرێنه‌ دادگه‌ و سزای یاساییان وه‌ربگرن". هیوا ئه‌حمه‌د وادەڵێت.