حکومەتی هەرێمی کوردستان لە ڕێگەی کەرتی تایبەتەوە گەنمی جووتیاران ساغ دەکاتەوە

ئاڤا نیوز

 

سێ ڕۆژ لەبەردەم جووتیاران ماوە، بۆ ئەوەی گەنمەکانیان ڕادەستی سایلۆکان بکەن، دوای تەواوبوونی ئەم وادەیە نزیکەی 500 هەزار تۆن بەرهەمی ئەمساڵ کە دەمێنێتەوە لە ڕێگەی کۆمپانیاکانی کەرتی تایبەت ساغ دەکرێتەوە. 

 

وێنە گەورەکە: شەش ڕۆژە پڕۆسەی وەرگرتنی گەنم لە پارێزگاکانی عێراق تەواو بووە و لە پارێزگاکانی هەرێمی کوردستان نزیکەی 100 تۆن ماوە وەربگیرێت، زیاتر لە 525 ملیار دینار پارەی جووتیاران لای بەغدا ماوە بینێرێت.

 

لێدوانی فەرمی: د. زیدا محەممەد، بەڕێوەبەری گشتیی پلاندانان و بەدواداچوون لە وەزارەتی کشتوکاڵی هەرێمی کوردستان بە ئاڤا نیوزی ڕاگەیاند: ئەو گەنمەی لە ڕێگەی کۆمپانیاکانی کەرتی تایبەت ساغ دەکرێتەوە بەپێی جۆر و کوالێتییەوە نرخیان بۆ دیاری دەکرێت. 

 

ئەوەی پێویستە بیزانیت: ئەمساڵ لیژنەی بەبازاڕکردنی گەنم لە عێراق پشکی هەرێمی کوردستانی بە 700 هەزار تۆن دیاری کردبوو، لەکاتێکدا پێشبینی دەکرێت بەرهەمی گەنمی ئەمساڵ زیاتر لە یەک ملیۆن تۆن بێت، هاوکات لە کۆی زیاتر لە 700 ملیار دینار پارەی گەنمی جووتیاران تەنیا 70 ملیاری نێردراوە.