نەشتەرگەرییەکی دەگمەن بۆ منداڵێکی سێ ساڵ دەکرێت

ئاڤا نیوز  

بۆ یەکەمجارە لەسەر ئاستی عێراق نەشتەرگەریەکی دەگمەن لە نەخۆشخانەیەکی سلێمانی، بۆ منداڵێکی تەمەن سێ ساڵ دەکرێت، کە گرفتی گەشە نەکردنی شەویلاگی هەبووە.

وێنە گەورەکە: لە نەخۆشخانەکانی هەرێمی کوردستان، بەشێکی بەرچاو لە نەشتەرگەری و چارەسەر بۆ هاونیشتمانیان بە کوالێتی و تایبەتمەندی جیهانی بە ئامێری پێشکەوتوو ئەنجام دەدرێت.

چیرۆکی سەرەکی: منداڵێکی تەمەن سێ ساڵ، گرفتار بوو بەدەست گەشەنەکردنی لایەکی شەویلاگی، توانای خواردن و قسەکردنی نەبوو، تێچووی چارەسەرەکەی زۆر بوو، پزیشكانی پسپۆڕی نەخۆشخانەی سلێمانی بۆ نەشتەرگەری جوانکاری بڕیاریاندا نەشتەرگەری بۆ بکەن.

لێدوانی فەرمی: د.ڕامیار ڕەحیم، پزیشکی نەشتەرگەری دەم و ددان و ستافی نەشتەرگەریەکە بە ئاڤا نیوزی ڕاگەیاند: ئەو پرۆسەیە پێویستی بە ئامێرێک بوو لە دەرەوەی وڵات هەبوو، نرخەکەی تا نۆ هەزار دۆلار بوو، پرۆسەکە 18 ملیۆن دیناری دەویست، بەڵام لە تاقیگەی دکتۆر داستان ئەو ئامێرە دروستکرا و سەرکەوتووانە نەشتەرگەریەکەی بۆ کرا و تێچووەکەی تەنیا 600 هەزار دینار بوو.

زانیاریی زیاتر: "لە هەزار منداڵ سێ منداڵ ڕووبەڕووی هەمان گرفت دەبنەوە، بەشێک لەو منداڵانە شێوەیەیان زۆر خراپ تێکدەچێت و ناتوانرێت بهێنرێنە ناو کۆمەڵگە" د.ڕامیار ڕەحیم ئەمەی گوت.