ئیسرائیل هێرشی پێشوەختە بۆ سەر ئێران تاوتوێ دەکات

ئاڤا نیوز

ئیسرائیل پلان بۆ ڕێگریکردن لە هێرشی ئێران دادەنێت، لەكاتێكدا ئێران بەڵێنی داوە لە تۆڵەی کوژرانی ئیسماعیل هەنییە ئیسرائیل سزا بدات. 

وێنە گەورەکە: بەرپرسانی ئیسرائیل سەرقاڵی لێکۆڵینەوەن لە ئەگەری هێرشی ئێران، بە گوێرەی میدیاکانی ئیسرائیل ئەگەر "بەڵگەی تەواو"یان دەست بکەوێت کە ئێران هێرش ئەنجام دەدات، ئەوا ئیسرائیل هێرشی پێشوەختە دەکاتە سەر ئێران و ئەمەش بە مەبەستی بەرگرتنە لە ئێران لە ئەنجامدانی هێرشەکەی.

زانیاریی بەدەستهاتوو: ئەم بیرۆکەیە دوای کۆبوونەوی بنیامین نەتەنیاهۆ، سەرۆکوەزیرانی ئیسرائیل لەگەڵ بەرپرسانی دامەزراوە ئەمنییەکانی ئەو وڵاتە گەڵاڵە بووە.

ئەوەی پێویستە بیزانیت: چوارشەممەی ڕابردوو لە تارانی پایتەختی ئێران ئیسماعیل هەنییە بەرپرسی مەكتەبی سیاسی حەماس كوژرا، ئێران هەڕەشەی تۆڵەكردنەوە لە ئیسرائیل دەكات.