بڕیاری قەدەغەکردنی بەرهەمی کارگە و پرۆژەکانی هەرێمی کوردستان ڕادەگیرێت

ئاڤا نیوز

سەرۆکی نوێنەرایەتیی حکومەتی هەرێمی کوردستان لە بەغدا ڕایگەیاند، شاندێکی حکومەتی هەرێمی کوردستان لە بەغدایە، لەگەڵ بەرپرسانی عێراق بابەتی قەدەغەکردنی بەرهەمی کارگە و پرۆژەکانی هەرێمی کوردستان بۆ پارێزگاکانی عێراق تاوتوێ کراوە و بڕیارەکە ڕاگیراوە.

وێنە گەورەکە: هەندێک خاڵی گومرگی لە نێوان پارێزگاکانی هەرێمی کوردستان لەگەڵ عێراق دانراون، بەپێی بڕیارێک ئەگەر کۆمپانیاکانی هەرێمی کوردستان و خاوەن بەرهەمەکان لە بەغدا مۆڵەتیان نەبێت ڕێگەیان پێنادرێت کەلوپەلیان تێپەڕێت.

 لێدوانی فەرمی: فارس عیسا، سەرۆکی نوێنەرایەتیی حکومەتی هەرێمی کوردستان لە بەغدا لە کۆنگرەیەکی ڕۆژنامەوانیدا ڕایگەیاند: لەسەر ڕاسپاردەی سەرۆکوەزیران بارزانی شاندێکی حکومەتی هەرێمی کوردستان لە بەغدایە و لەگەڵ لایەنی بەرپرسی عێراقی کۆبوونەوە و تەواوی پرسەکان تاوتوێ کراوە و ڕێککەوتنێک کراوە.

زانیاریی زیاتر: بڕیار و ڕێکارەکانی حکومەتی عێراق کە لە سەرەتای ئەم مانگەوە دەرچووە، تاوەکو سەرەتای مانگی داهاتوو ڕادەگیرێت، تاوەکو هەردوولا پێداچوونەوەی بۆ دەکەن.

قووڵتر: هەروەها ڕێککەوتن کراوە ئەو کارگە و پرۆژانەی لە هەرێمی کوردستان مۆڵەتیان هەیە، پێویست نەکات لە بەغدا دووبارە مۆڵەت وەربگرنەوە و خۆیان تۆمار بکەن، ئەمە مافێکی دەستوورییە.

گۆشەیەکی دیکە: یەکێک لە بابەتەکانی دیکە بابەتی ئەو کۆمپانیانەی کە مۆڵەتیان لە هەرێمی کوردستان هەیە ڕێگەیان پێبدرێت بەشداری سەکۆی بانکی ناوەندی ببن بۆ سوودوەرگرتن لە نرخی دۆلار هاوشێوەی کۆمپانیا عێراقییەکان.