لە عێراق 150 هه‌زار پیاو بۆ وه‌رگرتنی مووچه‌ وەک ژن خۆیان تۆمار دەکەن

ئاڤا نیوز

له وەزارەتی کار و کاروباری کۆمەڵایەتیی عێراق، 150 هه‌زار پیاو وەکو ژن ناوی خۆیان تۆمارکردووە و داواكارییان پێشكه‌شكردووه‌ بۆ وه‌رگرتنی مووچه‌ی پاراستنی كۆمه‌ڵایه‌تی.

وێنە گەورەکە؛ حکومەتی عێراق بەمەبەستی کەمکردنەوەی هەژاری، مووچەی هاوکاری کۆمەڵایەتی دەداتە خێزانە هەژارەکان و خاوەن پێداویستییە تایبەتەکان، بەڵام وەکو بەرپرسانی عێراق ئاماژەی پێدەکەن گەندەڵییەکی زۆر لەو بوارەدا کراوە و کەسانی ناشایستە لێی سوودمەند دەبن.


لێدوانی فەرمی: ئەحمەد خەلەف، سەرۆکی ده‌سته‌ی پاراستنی كۆمه‌ڵایه‌تی له وەزارەتی کار و کاروباری کۆمەڵایەتیی عێراق لە ڕاگەیێنراوێکدا دەڵێت "مووچەی هاوکاری کۆمەڵایەتی یەکسانە بە مووچەی فەرمانبەر، بەڵام گەندەڵییەکی زۆر لەو بوارە هەیە و خەڵکانێک بۆ مەرامی خۆیان بەکاری دەهێنن".

لە دوایین بەدواداچووندا کە ماوەیەک پێش ئێستا کراوە و ئەحمەد خەلەف ئاماژەی پێکردووە، 35 هەزار سەرپێچی و پێشێلکاری لە وەزارەتی کار و کاروباری کۆمەڵایەتی عێراق تۆمارکراون، نوێترین گەندەڵیش داواکاریی 150 هەزار پیاوە بۆ وەرگرتنی مووچە کە خۆیان وەک ژن تۆمارکردووە.


باکگراوند: لە پڕۆژەیاسای بودجەدا 600 هەزار خێزان مووچەی پاراستنی کۆمەڵایەتییان بۆ دابیندەکرێت و 6 ترلیۆن دیناریش بۆ پاراستنی کۆمەڵایەتی و خاوەن پێداویستییە تایبەتەکان تەرخانکراوە. بەپێی داتاکانیش کۆی گشتی مووچەخۆرانی وەزارەتی کار و کاروباری کۆمەڵایەتی گەیشتووەتە حەوت ملیۆن کەس.