کێشەی مووچەی خانەنشینانی پێشمەرگە چارەسەر دەکرێت

ئاڤا نیوز

 

زیاتر لە 90 هەزار خانەنشینی پێشمەرگە تائێستا مووچەیان هاوتانەکراوە، ڕۆژی دووشەممە شاندێکی حکومەتی هەرێمی کوردستان لەسەر ئەو پرسە و چەند بابەتێکی دیکە سەردانی بەغدا دەکات.

 

لێدوانی فەرمی: ئومێد سەباح، سەرۆکی دیوانی ئەنجوومەنی وەزیرانی هەریمی کوردستان لەمیانەی بەشداریکردنی لە گەشتی هەواڵەکانی کاتژمیر 7:00 ــی ئاڤا نیوزی ڕاگەیاند: سبەی دووشەممە شاندێک سەردانی بەغدا دەکات، ڕۆژی سێشەممە کۆبوونەوەیەک لەگەڵ لایەنی عێراقی دەکەن، بۆ ئەوەی بزانن مووچەی خانەنشینانی سەربازی و ئەمنی چۆن هاوتا دەکرێت.

 

ئەوەی پێویستە بیزانیت: لە عێراق یاسایەک بۆ بابەتی خانەنشینانی مەدەنی و سەربازی هەیە، ئەم یاسایە ماوەی 10ساڵە لە عێراق کاری پێدەکرێت، بەڵام لە هەرێمی کوردستان لە مووچەی مانگی حەوتی ئەمساڵەوە کاری پێدەکرێت، بۆیە بەرپرسانی هەرێمی کوردستان دەڵێن، پێویستیان بە هەماهەنگی و ئەزموونێک هەیە، تا ئەم یاسایە لەسەر ڕێچکەی خۆی بڕوات.

 

باکگراوند: کۆی خانەنشینان لە هەرێمی کوردستان ژمارەیان نزیکەی 250 هەزارە، نزیکەی 90 هەزاریان خانەنشینی پێشمەرگەن، بەهۆی هەبوونی چەند گرفتێک تاوەکو ئێستا مووچەکانیان لەگەڵ خانەنشینانی عێراق هاوتا نەکراوە، بەڵام خانەنشینانی مەدەنی و خانەنشینانی هێزە ئەمنییەکان مووچەیان هاوتاکراوە .