بۆ بڕینەوەی مووچە ناوی 205 هەزار کەس بۆ بەغدا دەنێردرێت

ئاڤا نیوز

 

وەزارەتی كار و كاروباری كۆمەڵایەتیی لیستێک كە ناوی 205 هەزار خێزانی تێدا تۆمار كراوە، بەمەبەستی پێدانی مووچەی كەمدەرامەتان بۆ بەغدا دەنێرێت.

وێنە گەورەكە: تاوەكو ساڵی 2015 لە هەرێمی كوردستان مانگانە 88 هەزار خێزانی كەمدەرامەت مووچەی كەمدەرامەت و هەژار و بێسەرپەرشتانیان وەردەگرت، بەڵام دواتر ڕاگیرا، ئێستا وەزارەتی كار و کاروباری کۆمەڵایەتی سەرقاڵی دووبارەكردنەوەی پرۆسەكەیە.

 

لێدوانی فەرمی: كوێستان محەممەد، وەزیری كار و كاروباری كۆمەڵایەتی لە كۆنفڕانسێكی ڕۆژنامەوانیدا ڕایگەیاند: لیستێكمان بۆ بەغدا ناردووە كە ناوی 205 هەزاری كەمدەرامەتی تێدا تۆمار كراوە بۆ ئەوەی مانگانە هاوكارییەكیان وەك مووچە پێبدرێت دوای ئەوەی بەغدا ڕەزامەندی دەدات، پێداچوونەوە بە لیستەكە دەكەین و كەمێك گۆڕانكاریی تێدا دەكەین.

 

زانیاریی زیاتر: لە عێراق دوو ملیۆن و 700 هەزار خێزان هاوكاریی مانگانە وەردەگرن، لە دوایین كۆبوونەوەی شاندی باڵای هەرێمی كوردستان و عێراق ئەو بابەتە باس كراوە، بەڵام تاوەكو ئێستا عێراق ڕەزامەندی لەسەر لیستی هەرێمی كوردستان نەداوە.

 

ئەوەش بزانە: بەپێی ڕووپێوییەكی ڕێكخراوی بانكی نێودەوڵەتی، لەكۆی ئەو 88 هەزار خێزانەی وەك كەمدەرامەت لە هەرێمی كوردستان مووچەیان وەردەگرت، تەنیا 10%ی شایەنی هاوكارییەكە بوون و هەزاران خێزانی دیكە هەبوون ناویان تۆمار نەكراوە.

 

ژمارەکان وا دەڵێن: مووچەی كەمدەرامەتان لە عێراق، لەنێوان 250 هەزار دینار تاوەكو 400 هەزار دینارە و مانگانە دابەش دەكرێت.