پزیشکیان: تەقینەوەکانی لوبنان شەرمەزارین بۆ هاوپەیمانانی ئیسرائیل

ئاڤا نیوز 

 

سەرۆککۆماری ئێران لەسەر تەقینەوەی پەیجەرەکانی حیزبوڵڵا هاتە دەنگ و ڕایگەیاند، ئەو ڕووداوە مایەی شەرمەزارییە بۆ وڵاتانی ڕۆژئاوا و لە سەروو هەمووشیانەوە ئەمریکا کە هاوپەیمانی ئیسرائیلن.

 

لێدوانی فەرمی: مەسعود پزیشکیان، سەرۆککۆماری ئێران لە کۆبوونەوەیەکی حکومەتەکەیدا، ئاماژەی بەوە کرد، ئیسرائیل و هاوپەیمانەکانی لە پێناو ئامانجە نامرۆییەکانیاندا سڵ لە هیچ ئامرازێک ناکەنەوە و تەنانەت ئەو ئامرازانەشی کە بۆ خۆشگوزەرانی و ئاسایشی مرۆڤ بەرهەمهێنراون، وەک ئامرازێک بۆ "تیرۆر" و لەناوبردنی کەسانی دیکە کە پێچەوانەی ئەوان بیر دەکەنەوە، بەکار دەهێنن.

 

زانیاریی زیاتر: پزیشکیان ئەوەشی گوتووە، تەقینەوەی پەیجەرەکانی لوبنان بەڵگەی داڕمانی مرۆڤایەتی و زاڵبوونی بەربەریەت و تاوانکارییە.

 

باکگراوند: بەهۆی تەقینەوەی ئامێرەکانی پەیجەر لە سەرتاسەری لوبنان لانیکەم 12 کەس کوژران و نزیکەی 2800 کەسیش بریندار بوون.

 

ئەمەش بزانە: تائێستا هیچ لایەنێک بەرپرسیارێتی ڕووداوەکەی لوبنانی نەگرتووەتە ئەستۆ، بەڵام حیزبوڵڵا پەنجەی تۆمەت بۆ ئیسرائیل درێژ دەکات.