بەرپرسی پێشووی فڕۆکەخانەی نەجەف بەهۆی گەندەڵیکردن 10 ساڵ زیندانی دەکرێت

ئاڤا نیوز

 

دەستەی دەستپاکیی عێراق بە تۆمەتی گەندەڵیکردن، سزای 10 ساڵ زیندانیکردنی بۆ سەرۆکی پێشووی ئەنجوومەنی بەڕێوەبردنی فڕۆکەخانەی نەجەف و سێ لە ئەندامانی ئەنجوومەنەکە دەرکرد.

 

وێنە گەورەکە: چوار بەرپرسی باڵای فڕۆکەخانەی نەجەف بە تۆمەتی گەندەڵیکردن و خراپ بەکارهێنانی پۆستەکانیان و وەرگرتنی سەدان ملیۆن دۆلار سزای تووندیان بۆ دەرچوو، ئاشکراکردنی گەندەڵیی بەرپرسان بابەتێکی نامۆ نییە لە عێراق کە لە دوو دەیەی ڕابردوودا بەردەوام لە هەڵکشان دایە.

 

ڕاگەیێنراوی فەرمی: بەپێی بەیاننامەی دەستەی دەستپاکیی عێراق، دادگەی ناوەندیی تاوانەکانی بەرەنگاربوونەوەی گەندەڵی بێ ئامادەبوونی، سزای 10 ساڵ زیندانی و 10 ملیۆن دیناری بەسەر فائید کازم شەمەریی دەرکرد کە سەرۆکی پێشووی ئەنجوومەنی بەڕێوەبردنی فڕۆکەخانەی نەجەف بوو.

 

زانیاریی زیاتر: سێ ئەندامی ئەنجوومەنی بەڕێوەبردنی فڕۆکەخانەکەش هەمان سزایان بۆ دەرچوو، لەوانە "حوسێن نیعمە زاملی، کەریم خەساف خەفاجی و موستەفا موعین تەریحی".

 

هۆکارە زانراوەکان: تۆمەتباران گەندەڵییان لە گرێبەستی ئامادەکردنی دیزاین و بەیاننامە بۆ دروستکردنی ڕێڕەوی نوێی فڕین بۆ فڕۆکەخانەی نەجەف و ڕێڕەوە تایبەتییەکانی کردووە، بە بڕی 71 ملیۆن 989 هەزار دۆلار بە داوای ڕاستەوخۆ ڕەوانەی هاوپەیمانییەکی ژمارەیەک کۆمپانیا کراوە، پرۆژەکەش وەک تەندەرێکی گشتی ڕانەگەیێنراوە.