وەزارەتی دارایی داوای ڕاکێشانی پارەی مووچە لە بانکی ناوەندیی دەکات

ئاڤا نیوز

 

وەزارەتی دارایی هەرێمی کوردستان داوا لە لقی هەولێری بانکی ناوەندیی عێراق دەکات ئەو پارەیە ڕابکێشن کە بۆ مووچە نێردراوە و بڕەکەی 572 ملیار و 738 ملیۆن دینارە.

 

وێنە گەورەکە: ڕۆژی یەکشەممە 22-09-2024 وەزارەتی دارایی و ئابووریی هەرێمی کوردستان ڕایگەیاند، بەغدا بڕی 572 ملیار دیناری بۆ مووچەی مانگی هەشت خستە سەر هەژماریی وەزارەتی دارایی و لە ماوەی داهاتوو لیستی مووچەی مانگی هەشت ڕادەگەیێنن. 

 

بڵاوکراوەی فەرمی: بەپێی نووسراوێکی وەزارەتی دارایی و ئابووری کە واژۆی ئاوات شێخ جەنابی لەسەرە، ئاراستەی بانکی ناوەندیی عێراق، لقی هەرێمی کوردستان کراوە بۆ ڕاکێشانی ئەو پارەیەی خراوەتە سەر هەژماری وەزارەتیان کە بڕەکەی 572 ملیار و 738 ملیۆن دینارە بۆ تەواوکردنی مووچەی مانگەکانی حەوت و هەشت.

 

ئەوەی پێویستە بیزانیت: پێشتر سەرچاوەیەک لە وەزارەتی دارایی و ئابووریی هەرێمی کوردستان، بە ئاڤا نیوزی ڕاگەیاندبوو: 572 ملیار دینار خرایە سەر هەژماری بانکی هەرێمی کوردستان، پارەکەی بەغدا لێبڕاوی مووچەی مانگەکانی ڕابردووە، دوای وەرگرتنی ئەو بڕە پارەیە کورتهێنانەکەی بە داهاتی ناوخۆ پڕدەکاتەوە و بۆ مووچەی مانگی هەشت دابەشی دەکات.

 

ئەوەش بزانە: حکومەتی هەرێمی کوردستان بۆ دابەشکردنی مووچەی فەرمانبەرانی مانگانە پێویستی بە  یەک تریلیۆن و 59 ملیار و 83 ملیۆن و 453 هەزار و 818 دینارە.