ئیسرائیل 150 شوێن لە لوبنان بۆردوومان دەکات

ئاڤا نیوز

گوتەبێژی سوپای ئیسرائیل ڕایدەگەیێنێ، لە ڕێگەی دەیان فڕۆکەی جەنگییەوە 150 شوێنیان لە لوبنان بۆردوومان کردوون.

 

وێنە گەورەکە: شەڕی نێوان سوپای ئیسرائیل و حیزبوڵڵای لوبنان کە بەهۆی شەڕی غەززەوە هەڵگیرسا، ڕۆژ لەدوای ڕۆژ لە فراوانبووندایە، وڵاتانیش هۆشداری دەدەن شەڕەکە زیاتر فراوانبێت.

 

لێدوانی فەرمی: دانیال هاگار، گوتەبێژی سوپای ئیسرائیل ڕایگەیاند: سەر لە بەیانی ئەمڕۆ  دووشەممە زیاتر لە 150 هێرشییان کردوونەتە سەر بنکە و پێگەکانی حیزبوڵڵا لە باشوور و ڕۆژهەڵاتی لوبنان.

هۆکارە زانراوەکان: هاگار دەڵێت زانیارییان هەبووە حیزبوڵڵا مووشەکی کرووزی دوورمەودا و مامناوەندی هەیە، لەنێو خانووی مەدەنی حەشاری داون و نیازی هێرشیان هەبووە،  بەنیازەکەیان زانیوە و پێشوەختە ئەو ناوچانەیان دەستنیشان کردوون و دواتر بۆردوومانیان کردوون.

لەلایەکی دیکەوە: سەرکردەیەکی حیزبوڵڵای لوبنان ڕایگەیاند: "شەڕێکی کراوە لەئارادایە، چونکە پێدەچێت هەردوولایەن بەرەو شەڕی سەرتاسەری نزیکتر ببنەوە". 

زیانە گیانییەکان: هەرچەندە ئامارێکی ورد بەردەست نییە، بەڵام میدیاکان ئاماژە بە ژمارەیەک کوژرا و دەیان بریندار دەکەن.