پڕۆژەیەکی گرنگ بۆ پاککردنەوەی هەوای کەرکووک جێبەجێ دەکرێت

ئاڤا نیوز

 

وەک هەنگاوی یەکەم بۆ خاوێنکردنەوەی کەرکووک لە دووکەڵی کارگەکان، پرۆژەیەکی گرنگ و ستراتیژی جێبەجێ دەکرێت، پارێزگاری کەرکووکیش دەڵێت؛ "ئەگەر ئەم هەنگاوە سەرکەوتووبێت، ئەوا بۆ هەموو کارگەکان فراوان و گشتگیر دەکرێت".

 

لێدوانی فەرمی: ڕێبوار تەها، پارێزگاری کەرکووک بە ئاڤا نیوزی گوت: ئیدارەی شارەکە بابەتی ژینگە و پاککردنەوەی شار لە دووکەڵ و زبڵ تاوتوێ کردووە، پرۆژەیەکیش بە هاوبەشی لەنێوان کەرتی تایبەت و حکومەت جێبەجێ دەکرێت.

 

پارێزگاری کەرکووک گوتیشی: کارگەی چیمەنتۆی شارەکە دووکەڵی زۆرە و داوامان لێکردوون فلتەری تایبەت بهێنن بۆ ئەوەی ڕێژەی دووکەڵەکەی کەمتر ببێتەوە، ئەگەر ئەم هەنگاوە سەرکەوتوو ببێت ئەوا بۆ هەموو کارگەکانی دیکە فراوان و گشتگیری دەکەین.

 

زانیاریی زیاتر: کارگەی چیمەنتۆی کەرکووک لە ساڵی 1979 دروست کراوە، لە کاتی کارکردنیدا دووکەڵێکی زۆر دروست دەکات و دەبێتە هۆی پیسکردنی ژینگەی شارەکە.

 
قوڵتر: فلتەری تایبەت بۆ کارگەکە هێنراوە و ئەمڕۆ لە بەشی بەرهەمهێنانی کارگەکە بەگەڕخراوە و بۆ ماوەی 30 ڕۆژ کار دەکات، تاوەکو دەرئەنجامەکەی ببینرێت، دواتر فلتەر بۆ بەشی دووەمی بەرهەمهێنانی کارگەکە دادەنرێت.

 
خاڵی ئەرێنی: جێبەجێکردنی پرۆژەکە و سەرکەوتنی 80٪ بۆ 90٪ی ڕێژەی دووکەڵی زیان بەخش کەم دەکاتەوە.
 
ئەوەی پێویستە بیزانیت: تێچووی پرۆژەکە یەک ملیۆن دۆلارە، ئەوە سەرەڕای تێچووی کۆمپانیای جێبەجێکار.
 
بۆچی گرنگە: بەهۆی دووکەڵی پیس و زۆری کارگەکان لە کەرکووک خەڵک بەردەوام ناڕەزایەتیی دەردەبڕن، بۆیە جێبەجێکردنی ئەم جۆرە پرۆژانە کاریگەریی ئەرێنی لەسەر خاوێن ڕاگرتنی هەوای شارەکە و ژینگەکەی دەبێت.