بۆ خۆتۆمارکردن لە بایۆمەتری دوا وادە دەدرێتە مووچەخۆران

ئاڤا نیوز

 

وەزارەتی دارایی و ئابووری هەرێمی کوردستان ڕایدەگەیێنێت، لەگەڵ وەزارەتی دارایی حکومەتی عێراق ڕێککەوتوون بۆ چارەسەرکردنی کێشە هونەرییەکانی لیستی مووچە و لەو چوارچێوەیە دەبێت هەموو فەرمانبەرێک بایۆمەتری ئەنجام بدات و دوا وادە دیاریکراوە.

 

وێنە گەورەکە: لەپێناو چارەسەرکردنی ئەو کێشانەی لە لیستی مووچە هەن، حکومەتی هەرێمی کوردستان بڕیاریداوە کە دەبێت هەموو مووچەخۆرێکی حکومەت تۆماری بایۆمەتری هەبێت.

 

ڕاگەیێنراوی فەرمی: بەڕێوەبەرایەتی گشتیی ژمێرکاری لە وەزارەتی دارایی و ئابووری حکومەتی هەرێمی کوردستان لە ڕاگەیێنراوێکدا سەرجەم مووچەخۆران ئاگادار دەکاتەوە، "تا 2024/11/20 پێویستە تۆماری بایۆمەتریان هەبێت و UPN-یان هەبێت، بە پێچەوانەوە حکومەتی عێراق مووچەکانیان ڕادەگرێت.

 

زانیاریی زیاتر: لەبەشێکی دیکەی ڕاگەیێنراوەکە ئەوە هاتووە، "بڕیاری خۆتۆمارکردن لە سیستەمی بایۆمەتری هەموو ئەو فەرمانبەر و مووچەخۆرانە دەگرێتەوە کە بەهۆکاری جیاواز لەدەرەوەی وڵاتن یان مۆڵەتی بێ مووچە و خوێندنیان هەیە".

 

باکگراوند: پێشتر وەزارەتی دارایی ڕایگەیاندبوو، لەماوەی دوو مانگی ڕابردوودا 105 هەزار فەرمانبەر تۆماری بایۆمەتریان ئەنجام دابوو، بەمەش 75%ـی کێشەکانی بایۆمەتری مووچەخۆران چارەسەر کراوە.