پارتی سەردانی کۆمەڵ دەکات و پێکهێنانی حکومەتی نوێ تاوتوێ دەکەن

ئاڤا نیوز

 

بە مەبەستی پێکهێنانی کابینەی 10یەم پارتی دیموکراتی کوردستان شاندێکی باڵای پێکهێناوە و لە یەکەم کاری لەگەڵ کۆمەڵی دادگەریی کۆدەبێتەوە.

 

وێنە گەورەکە: ڕۆژی 30-10-2024 کۆمیسیۆنی سەربەخۆی هەڵبژاردنەکان، ئەنجامی کۆتایی هەڵبژاردنی پەرلەمانی کوردستانی ڕاگەیاند، پارتی توانی 39 کورسی و کۆمەڵی دادگەریش 3 کورسی بەدەستهێناوە. 

 

لێدوانەی فەرمی: چیا هەرکی، یاریدەدەری مەکتەبی ڕێکخستنی پارتی لە هەولێر، بە ئاڤا نیوزی گوت: ڕۆژی 3-11-2024، شاندەکەی پارتی سەردانی عەلی باپیر سەرۆکی کۆمەڵی دادگەری کردووە، بڕیارە سەردانی لایەنەکانی دیکەش بەردەوام بێت، بەڵام دوور لە چاوی میدیاکان دەبێت. 

 

لە لایەکی دیکەوە: ئەمڕۆ دووشەممە، سەرۆک مەسعود بارزانی لە میانەی کۆبوونەوەی لەگەڵ باڵیۆزی ئەمریکا لە عێراق جەختی لەوە کردەوە بۆ پێکهێنانی حکومەتی داهاتوو ڤیتۆی لەسەر هیچ لایەنێک نییە. 

 

ئەوەش بزانە: شاندەکەی پارتی لە هۆشیار زێباری، پشتیوان سادق، دڵشاد شەهاب، ئومێد سەباح پێکهاتووە، ئەگەر بچنە سلێمانی عەلی حسێن دەبێتە ئەندامی شاندەکە، سەردانی دهۆک بکەن سەربەست لەزگین دەبێتە ئەندام.

 

ئەوەی پێویستە بیزانیت: بە گوێرەی ئەنجامەکانی هەڵبژاردن هیچ لایەنێک نەیتوانیوە 50+1 بەدەستبهێنێت و هەر لایەنێکیش بیەوێت حکومەتی داهاتوو پێکبهێنێت پێویستە هاوپیەمانییەتی لەگەڵ چەند لایەنێک بکات بۆ ئەو مەبەستە.