وەزارەتی كارەبا: ڕۆژانە 14 بۆ 16 كاتژمێر كارەبای نیشتیمانی دەدرێت

ئاڤا نیوز

 

وتەبێژی وەزارەتی كارەبای حكومەتی هەرێمی كوردستان ڕایدەگەیێنێت، لە ماوەی دوو ساڵدا پرۆژەی ڕووناكیی 24 كاتژمێری دەگاتە تەواوی هەرێمی كوردستان و ئێستا ڕۆژانە  14 بۆ 16 كاتژمێر كارەبا دەدرێت.

لێدوانی فەرمی: ئومێد ئەحمەد، وتەبێژی وەزارەتی كارەبا ڕایگەیاند: توانای بەرهەمهێنانی كارەبا 3200 تا 3500 مێگاواتە و خواست لەسەر کارەبا 4000 بۆ 4500 مێگاواتە، ئێستا لەنێوان 14 بۆ 16 كاتژمێر كارەبا دەدرێت بە هاوبەشان.

 

لەلایەكی دیكەوە: وتەبێژی وەزارەتی كارەبا ڕاشیگەیاند: لە ماوەی دوو ساڵدا پرۆژەی ڕووناكیی 24 كاتژمێری دەگاتە تەواوی هەرێمی كوردستان، پڕۆژەكە خواست لەسەر کارەبا كۆنترۆڵ دەكات و بارگرانی لەسەر هاووڵاتیان و حكومەت کەم دەکات، پرۆژەكە ژینگەپارێزە.

 

ئەوەش بزانە: بەپێی گوتەی وتەبێژی وەزارەتی كارەبا، كۆتایی بە كێشەی گەیاندنی كارەبا بۆ هەردوو وێستگەی 51 مێگاواتی و 29 مێگاواتی كارەبا لە سلێمانی هێنراوە.

 

گۆشەیەكی دیكە:  بە فەرمانی سەرۆكوەزیران مەسرور بارزانی، دەبێت پڕۆژەی ڕووناكی لە تەواوی هەرێمی كوردستان بە هاوتەریبی جێبەجێ بكرێت، لە چوار گەڕەكی شاری هەولێر جێبەجێ كراوە و لە داهاتوویەكی نزیك لە هەردوو شاری سلێمانی و دهۆكیش دەستپێدەكات.