ڕێبەر ئەحمەد: هەرێمی کوردستان نەبووەتە هەڕەشە بۆ سەر هیچ وڵاتێک

ئاڤا نیوز

 

وەزیری ناوخۆی هەرێمی کوردستان ڕایگەیاند، هەرێمی کوردستان هیچ کاتێک نەبووەتە هەڕەشە بۆ سەر هیچ وڵاتێک و داواش دەکات بەدواداچوون بۆ ئەو سکاڵایە بکرێت کە لە ئەنجوومەنی ئاسایش تۆمارکراوە.

 

وێنە گەورەکە: ئەمڕۆ ڕێوڕەسمی چلەی ماتەمینی هێرشەکەی ئێران بۆ سەر هەولێر بە بەشداریی کەسوکاری قوربانییان و بەرپرسانی حکومی و حیزبی هەرێمی کوردستان بەڕێوەچوو.

 

لێدوانی فەرمی: ڕێبەر ئەحمەد، وەزیری ناوخۆی حکومەتی هەرێمی کوردستان بە ئاڤا نیوزی ڕاگەیاند:

• هەرێمی کوردستان هیچ کاتێک نەبووەتە هەڕەشە بۆ سەر هیچ وڵاتێک، ئەمەش پلان و ستراتیژیەتی ئێمە دەبێت بۆ داهاتووش، هیوادارین لە دەوروبەریش بەهەمان چاو سەیری هەرێمی کوردستان بکرێت و ڕێز لە سەروەری عێراق و هەرێمی کوردستان بگرن، چیدیکە دەست نەخەنە ناو کاروباری عێراق بەشێوەیەکی گشتیی و دەستدرێژییەکان ڕابگرن".

• "داوا لە کۆمەڵگەی نێودەوڵەتی و حکومەتی فیدراڵی دەکەین، بە ئەرکی خۆیان هەڵسن و بەدواداچوون بۆ ئەو سکاڵایە بکەن کە لە ئەنجوومەنی ئاسایش تۆمارکراوە".

• "پێشڕەو دزەیی و ژینا، سمبولی خۆڕاگری و بەرخودانی هەرێمی کوردستان و هەولێرن، بەرامبەر ئەو زوڵمەی بەرامبەر بە هەرێمی کوردستان دەکرێت".