دوای بەدواداچوونی ئاڤا کێشەیەکی قوتابیانی خوێندنی باڵا چارەسەر کرا

ئاڤا نیوز 

 

دوای بەدواداچوونی ئاڤا میدیا و گەیاندنی داواكاریی قوتابیانی خوێندنی باڵا سەبارەت بە توانستی زمانی ئینگلیزی، وەزارەتی خوێندنی باڵا بڕیارێكی لە بەرژەوەندیی قوتابییەكان دا. 

 

چیرۆکی سەرەکی: لە چەند ڕۆژی ڕابردوودا ئاڤا نیوز داواكاریی هەزار و 400 قوتابی ماستەر و دکتۆرای گەیاندە لایەنە پەیوەندیدارەكان كە ناڕازی بوون لە شێوازی پەیڕەوكردنی مەرجی توانستی زمانی ئینگلیزی لە بەدەستهێنانی بڕوانامەكانیان، ئەمڕۆش ئەنجوومەنی وەزارەتی خوێندنی باڵا کۆبووەوە و لەمبارەیەوە بڕیاری دا.

 

ڕاگەیێنراوی فەرمی: وەزارەتی خوێندنی باڵا و توێژینەوەی زانستی ڕایگەیاند: تایبەت بە پرسى تاقیکردنەوەکانى توانستى زمانى ئینگلیزى خوێندکارانى خوێندنى باڵا، ئەنجوومەنى وەزارەت بڕیاری دا قوتابیانی خوێندنى ماستەر و دکتۆرا لە سەرجەم بەشەکانى کۆلێژەکان لە زانکۆ حکومییەکانى هەرێمى کوردستان ڕێگەیان پێدەدرێت بەبێ مەرجى توانستى زمانى ئینگلیزى تاووتوێى ماستەرنامە و تێزى دکتۆرا ئەنجام بدەن.

 

زانیاریی زیاتر: وەزارەتی خوێندنی باڵا ئاماژەی بەوە داوە كە دوای تاوتوێكردنی ماستەرنامە و تێزی دكتۆرا، ئەو قوتابیانە لەلایەن زانکۆکان بڕوانامەیان پێنابەخشرێت تاوەکو مەرجى توانستى زمانى ئینگلیزى بەپێى ڕێنماییەکانى پەیوەندیدار دەستەبەر دەکەن.