شەپۆلێکی بەفر و باران باشووری کوردستان دەگرێتەوە

ئاڤا نیوز

پێشبینی دەکرێت لە سبەی شەوەوە شەپۆلێکی سەرما و بارانبارین هەرێمی کوردستان بگرێتەوە، شێخ دارا دەڵێت، بارانێکی زۆر دەبارێت و لە سەرجەم ناوچەکان پەڵە دەدات، لە ناوچە شاخاوییەکانیش پلەکانی گەرما بۆ ژێر سفر دادەبەزن و بەفر دەبارێت.

لێدوانی فەرمی: شێخ دارا، شارەزا و پێشکەشکاری کەشوهەوای ئاڤا میدیا لە گەشتی هەواڵەکانی کاتژمێر 07:00 ڕایگەیاند: "سبەی شەو شەپۆلێکی بارانبارین ناوچەکانی هەرێمی کوردستان دەگرێتەوە و لە ناوچە شاخاوییەکان پلەکانی گەرما بۆ ژێر سفر دادەبەزن و بەفر دەبارێت."

بە وتەی شێخ دارا،  پلەکانی گەرما لە نێوان 8 بۆ 16 پلە دەبن، شەپۆلی بارانبارین لە سنووری دهۆک و شنگال دەستپێدەکات و باران بە بڕی جیاواز لە ناوچەکان دەبارێت، بەڵام لە سەرجەم ناوچەکان پەڵە دەدات.

ئەمەش بزانە: شەپۆلی سەرماکە لە دەریای ناوەڕاستەوە دێت و وڵاتانی سووریا، ئوردن، لوبنان و هەرێمی کوردستان دەگرێتەوە، لە ڕۆژهەڵاتی کوردستانیش لە سنە و سەقز بەفر دەبارێت.