لە توركیا 55 قاچاخچی و تۆمەتباری بازرگانیكردن بە مرۆڤ دەستگیردەکرێن

ئاڤا نیوز

 

وەزیری ناوخۆی توركیا ڕایدەگەیێنێت، لە ئۆپەراسیۆنێكی فراوان بە بەشداری سەروو 29 هەزار كارمەندی هێزی ئەمنی، 55 قاچاخچی و تۆمەتباری بازرگانیكردن بە مرۆڤیان دەستگیركردووە.

 

وێنە گەورەكە: توركیا بووەتە ترانزێتی گەیشتنی كۆچبەرانی نایاسایی لە وڵاتانی ئاسیا و ڕۆژهەڵاتی ناوەڕاستەوە بەرەو ئەوروپا، ساڵانە ژمارەیەكی زۆر كۆچبەر لە كەناراوەكانی ئەو وڵاتە دەخنكێن، و هەزارانی دیكەش لەلایەن هێزە ئەمنییەكانی توركیاوە دەستگیر دەكرێن و دیپۆرتی وڵاتانی خۆیان دەكرێنەوە. 

 

ڕاگەیێنراوی فەرمی: عەلی یەرلیکایا، وەزیری ناوخۆی تورکیا لە هەژماری فەرمی خۆی لە تۆڕی کۆمەڵایەتی 'ئێکس' ئەنجامی ئۆپەراسیۆنەکانی "کالکان-32"ـی بڵاوكردووەتەوە، كە لە سەرتاسەری تورکیا 55 قاچاخچی و بازرگانی بەقاچاخبردنی كۆچبەرانیان قۆڵبەست كردووە، كە 13 لە قاچاخچیە دەستگیركراوەكان بیانین.

 
زانیارییی زیاتر: ئۆپەراسیۆنەكانی "کالکان-32" بە هەماهەنگی هێزە ئەمنییەكانی توركیا، هێزەكانی پاسەوانی كەناراوەكان، داواكاری گشتی و بەڕێوەبەرایەتیی کۆچ کراوە، تیایدا پشكنین بۆ چوار هەزار و 840 باڵەخانە و هەشت هەزار و 213 شوێنی گشتی و تێرمیناڵ و شەقامە گشتییەكان كراوە.