بەهۆی شەڕەوە زیاتر لە 370 هەزار کەس لە سووریا ئاوارە دەبن

ئاڤا نیوز

لە یەکەم ڕۆژی دەستپیکردنی شەڕ و پێکدادانی سووریاوە تاوەکو ئێستا زیاتر لە 370 هەزار هاووڵاتیی سووریا ئاوارەبوون.

 

وێنە گەورەکە: ماوەی هەفتەیەکە شەڕ و ئاڵۆزییەکان بەرۆکی سووریای گرتووە، هێزەکانی ئۆپۆزسیۆنی سووریا تەحریرولشام ڕووبەڕووی سوپای ئەو وڵاتە بوونەتەوە و چەندین شاری ئەو وڵاتەشیان بە تەواوی کۆنترۆڵکردووە و لە پێشڕەویشدان بۆ دەستبەسەرداگرتنی دیمەشقی پایتەخت. 

 

ڕاگەیێنراوی فەرمی: ستیڤان دوجاریک، وتەبێژی نەتەوە یەکگرتووەکان ڕایگەیاند: دوای نوێبوونەوەی شەڕی ناوخۆ لە سووریا، لە ماوەی هەفتەیەکدا و تا ئێستا زیاتر لە 370 هەزار هاووڵاتیی ئاوارەبوون کە زۆربەیان ژن و منداڵن.

 

زانیاریی زیاتر: دوجاریک دەڵێت، دەیان هەزار کەس پەنایان بۆ باکووری ڕۆژهەڵاتی سووریا بردووە، زۆربەی ئاوارەکان لە دۆخێکی سەختدان و لەسەر شەقامەکان یان لەناو ئوتومبێلەکانیان دەخەون، بەهۆی دابەزینی پلەکانی گەرماشەوە مەترسی لەسەر ژیانیان دروستبووە.

 

ئەوەش بزانە: لە ماوەی هەفتەیەک شەڕ و پێکدادانی گرووپە چەکدارەکانی ئۆپۆزۆسیۆن و سوپای سووریا تا ئێستا 826 کەس کوژراون و لەو ژمارەیەش زیاتر لە 111 یان هاووڵاتی بێ چەکبوون.