نەتانیاهۆ: ڕووخانی ئەسەد بۆ ئیسرائیل دەرفەتێکی گەورە و گرنگە

ئاڤا نیوز

سەرۆکوەزیرانی ئیسرائیل دەڵێت، گۆڕانی دەسەڵات لە سووریا "بۆ ئیسرائیل دەرفەتێکی گەورە و گرنگە" بەڵام بێ مەترسیش نییە، جەختیش دەکاتەوە لەوەی بۆ پاراستنی ئاسایشی سنوورەکان هەر هەنگاوێک پێویست بێت ئەنجامی دەدات.

 

وێنە گەورەکە: دوای تێپەڕبوونی نیو سەدە لە حکومڕانی بنەماڵەی ئەسەد و 13 ساڵ بەسەر خۆپیشاندانەکانی سووریادا، بەرەبەیانی ڕۆژی یەکشەممە (8-12-2024) ئۆپۆزیسیۆن چەکداریی ئەو وڵاتە، دیمەشی پایتەختی کۆنتڕۆڵکرد و بەشار ئەسەد سەرۆکی سووریاش بەرەو ڕووسیا هەڵات.

 

پەیامی فەرمی: بنیامین نەتانیاهۆ، سەرۆکوەزیرانی ئیسرائیل لەمیانەی سەردانێکیدا بۆ سنووری وڵاتەکەی لەگەڵ سووریا، ئەوەی خستەڕوو، "ڕووخانی ئەسەد دەرفەتێکی گەورە و گرنگ بۆ ئیسرائیل دەڕەخسێنێت، بەڵام لە مەترسی گەورەش بەدوور نییە".

 

نەتانیاهۆ باسی ئەوەشی کرد "لەنزیکەوە چاودێریی گۆڕانکارییەکانی سووریا دەکەین و بۆ پاراستنی ئاسایشی سنوورەکانمان و ئاسایشی وڵاتەکەمان، ئەوەی پێویست بێت ئەنجامی دەدەین".

‎