گرووپە چەکدارەکان شاری منبج کۆنترۆڵ دەکەنەوە

ئاڤا نیوز

 

هێزەکانی ئەنجوومەنی سەربازیی لە شاری منبج لە ڕۆژهەڵاتی حەلەب پاشەکشەیان کرد و گرووپە چەکدارەکان جارێکی دیکە شارەکەیان کۆنترۆڵکردەوە. لەو نێوەندەشدا 50 چەکدار لە هەردوولا کوژراون.

 

وێنە گەورەکە: لەدوای کۆنترۆڵکردنی حەلەب، شەڕ و پێکدادان لەنێوان گرووپە چەکدارەکان و هێزەكانی سووریای دیموكرات "هەسەدە" لە شاری منبج بەردەوامە، ئەمە جاری دووەمە شارەکە لەلایەن گرووپە چەکدارەکانەوە کۆنترۆڵ دەکرێت دوای ئەوەی دوێنێ جارێکی دیکە لەلایەن هێزەکانی هەسەدەوە شارەکە کۆنترۆڵکرایەوە.

 

زانیاریی بەدەستهاتوو: ڕوانگەی سووری بۆ مافەکانی مرۆڤ ڕایگەیاند: هێزەکانی ئەنجوومەنی سەربازیی منبج لە ڕۆژهەڵاتی حەلەب پاشەکشەیان کرد و شارەکە لەلایەن گرووپە چەکدارەکانەوە کۆنترۆڵ کراوە.

 

زانیاریی زیاتر: بەگوێرەی ڕوانگەی سووری لە ئەنجامی پێکدادانەکاندا 15 چەکداری گرووپە چەکدارەکان و 35 چەکداری ئەنجوومەنی سەربازیی منبج و هێزەکانی ئاسایشی ناوخۆ کوژراون.

 

ئەوەی پێویستە بیزانیت: منبج دەکەوێتە ڕۆژهەڵاتی پارێزگای حەلەب، 30 کیلۆمەتر لە ڕۆژئاوای ڕووباری فورات دوورە، لە شارەکە عەرەب و کورد دەژین.