لە بارەی خەرجکردنی پارەی گەنمی جووتیاران نووسراوێک ئاراستەی سوودانی دەکرێت

ئاڤا نیوز

 

شەش مانگ بەسەر پرۆسەی ڕادەستکردنی گەنم لەلایەن جووتیارانەوە بە سایلۆکان تێپەڕبووە، بەڵام 22%ـی پارەکە لای حکومەتی فیدڕاڵی ماوە کە دەبێت لەماوەی 10 ڕۆژی داهاتوو بڕیار لە خەرجکردنی بدرێت.

 

وێنە گەورەکە: 15 ڕۆژ ماوە بۆ  تەواوبوونی ساڵی دارایی عێراق، دەبێت لەو ماوەیە بڕیاری خەرجکردنی 131 ملیار دینار وەک گوژمەی کۆتایی پارەی گەنمی جووتیارانی هەرێمی کوردستان بدرێت.

 

لێدوانی فەرمی: زۆزان کۆچەر، ئەندامی لیژنەی کشتوکاڵ لە پەرلەمانی عێراق بە ئاڤا نیوزی ڕاگەیاند، "نووسراوێک ئاراستەی سوودانی دەکەین، بۆ ئەوەی لەماوەی چەند ڕۆژی داهاتوو پارەکە خەرج بکرێت و لەوە زیاتر دوانەکەوێت."

 

گوتیشی، "هۆکاری دواکەوتنی پارەکە بۆ نەبوونی پارەی نەختینە لە وەزارەتی دارایی دەگەڕێتەوە، پێویستە پێش کۆتایی هاتنی ئەم مانگە پارەکە خەرج بکرێت."

 

ئەوەی پێویستە بیزانیت: ئەمساڵ وەزارەتی بازرگانی عێراق 700 هەزار تۆن گەنمی لە جووتیارانی هەرێمی کوردستان وەرگرتووە، لە کۆی 598 ملیار دینار پارەی ڕادەستکردنەکە 467 ملیار دیناری بەچەند گوژمەیەک خەرجکردووە.