بەفر سنووری حاجی ئۆمەران دادەپۆشێت

ئاڤا نیوز

 

بەفرێكی زۆر سنووری حاجی ئۆمەرانی داپۆشیوە و لە سەنتەری ناحیەكەش سەرووی 20 سانتیمەتر بەفر باریوە.

 

وێنە گەورەکە: ماوەی دوو هەفتەیە کاریگەریی شەپۆلێکی سەرمای جەمسەری باکوور و ناوچەکانی هەرێمی کوردستانی گرتووەتەوە، لە ناوچە شاخاوییەکان بەفر و لە ناوچەکانی دیکەش بارانباریوە، پلەکانی گەرما چەند پلەیەک دابەزیون.

 

ئەوەی پێشبینی دەكرێ: هەروەك پێشتر شێخ دارا، شارەزا و پێشکەشکاری کەشوهەوای ئاڤا میدیا پێشبینی كردبوو؛ لە شەوی ڕابردووەوە شەپۆلێکی بەفربارین ناوچەکانی دەوروبەری حاجی ئۆمەرانی  گرتۆتەوە و لە سەنتەری ناحیەكەش 20 سانتیمەتر بەفر باریوە، پلەكانی گەرماش هەشت پلە دابەزیون و پلەی گەرمی تۆماركراو ژێر سفری سەدییە.
 
ئەوەی پێویستە بیزانیت: سەرەڕای بەردەوامی بارینی بەفر، هاتووچۆی گەشتیاری و جموجۆڵی بازرگانی لە دەروازەی نێودەوڵەتی حاجی ئۆمەران نەوەستاوە، بەوپێیەی تیمەكانی بەفرڕاماڵینی سەر بە ئیدارەی سەربەخۆی سۆران، لە بەیانی زووەوە سەرقاڵی پاككردنەوەی رێگاوبانەکانی سنووری حاجی ئۆمەرانن، بەمەبەستی لابردنی ئاستەنگ بۆ هاتووچۆی هاووڵاتیان.