سەرچاوەیەکی ئەمنی: زیاتر لە سێ هەزار و 500 سەربازی سوپای سووریا لە عێراقن

ئاڤا نیوز

 

هاوکات لەگەڵ کەوتنی دەسەڵاتی بەشار ئەسەد و شکستهێنانی سوپای ئەو وڵاتە، هەزاران سەرباز و ئەفسەری پلە جیاواز ڕوویان لە عێراق کرد و حکومەتیش لە نزیک سنووری سووریا نیشتەجێی کردوون.

 

وێنە گەورەکە: دوای ئەوە سەربازانی سوپای سووریا لە ڕووبەڕووبوونەوەیان لەگەڵ چەکدارانی ئۆپۆزیسیۆن شکستیانهێنا بەشێکی زۆریان بۆ پاراستنی گیانیان ڕوویان لە عێراق کرد، سەرچاوەیەکی ئەمنیش شوێنی نزیکەی دوو هەزار سەربازی ئەو وڵاتە ئاشکرا دەکات. 

 

لێدوانی فەرمی: سەرچاوەیەکی ئەمنی لە پارێزگای ئەنبار بە ئاڤا میدیای ڕاگەیاند: تاوەکو ئێستا سێ هەزار و 500 سەرباز و ئەفسەری سوپای سووریا لە گەیشتوونەتە عێراق، حکومەت نزیکەی دوو هەزاریانی بۆ کەمپێک گواستووەتەوە لە بیابانی ڕووتبە و ناوچەی کیلۆ 160 لە ڕۆژئاوای پارێزگای ئەنبار کە 300 کیلۆمەتر لە سنووری ئوردنەوە دوورە.

 

ئەوەی پێویستە بیزانیت: پێشتر حکومەتی ڕاگوزەریی سووریا داوای لە حکومەتی عێراق کردبوو ئەو سەربازانەی ڕادەست بکاتەوە، گفتوگۆکانی نێوان هەردوو حکومەت لەمبارەیەوە بەردەوامە.