ئۆپۆزیسیۆنی ئیسرائیل: نەتانیاهۆ مەبەستی نییە جەنگی غەززە بوەستێت

ئاڤا نیوز

 

سەرۆکی ئۆپۆزیسیۆنی ئیسرائیل ئاماژە بەوە دەكات، بنیامین نەتانیاهۆ سەرۆکوەزیرانی ئیسرائیل هەوڵی تێکدانی ڕێککەوتنی گەڕاندنەوەی بارمتەكان دەدات، چونکە نایەوێت شەڕی غەززە ڕابگرێت و ترسی ئەوەی هەیە کاتێک کە شەڕ وەستا، كابینەكەی بکەوێت.

 

لێدوانی فەرمی: یائیر لابید، سەركردەی بەرەی ئۆپۆزیسیۆنی ئیسرائیل، ئەمڕۆ یەكشەممە 22-12-2024، ڕایگەیاند: حكومەتەكەی نەتانیاهۆ خەمساردە لە دۆسیەی گەڕاندنەوەی بارمتەكانی دەستی حەماس و بەبیانوو بابەتەكە ئاڵۆزتر دەكرێت، بۆ ئەوەی جەنگی كەرتی غەززە نەوەستێت.

 

ڕوونیشی كردەوە، هەر جارێك ئیسرائیل و حەماس لە ڕێككەوتن نزیك دەبنەوە، حكومەتی نەتانیاهۆ مەرجی نوێ دەسەپێنێت و پرۆسەكە پووچەڵ دەكاتەوە.

 

ئەوەی پێویستە بیزانیت: بە گوێرەی میدیا عیبرییەكان، لەم دواییانەدا دانووستانەكانی قەتەر بۆ ئاگربەست لە کەرتی غەززە و ئاڵوگۆڕی گیراوان و بارمتەكان، پێشكەوتنی بەرچاوی بەخۆیەوە بینیوە و كەلێنی بچووك لەنێوان ئیسرائیل و حەماس ماون تاوەكو قۆناغی كۆتایی ڕێككەوتنی ئاگربەست ڕابگەیێنن.