وەزیری دەرەوەی عێراق: نابێت دەرفەت بە تیرۆر بدرێت دۆخی سووریا بقۆزێتەوە

ئاڤا نیوز

 

وەزیری دەرەوەی عێراق ڕایدەگەیێنێت، نابێت دەرفەت بە تیرۆر بدرێت دۆخی ئێستای سووریا بقۆزێتەوە و داواش لە کۆمەڵگەی نێودەوڵەتی دەکات پشتیوانی گەلی سووریا بکات.

 

وێنە گەورەکە: ماوەی چەند ڕۆژێكە جوڵەیەکی دیپلۆماسی وڵاتانی ڕۆژئاوا بەرەو عێراق دەبینرێت، بەجۆرێک لە دوو ڕۆژدا وەزیرانی بەرگریی ئیتاڵیا و هۆڵەندا سەردانی بەغدایان کردووە، هاوکات وەزیری بەرگریی ئیتاڵیا سەردانی هەرێمی کوردستانیشی کرد.

 

ڕاگەیێنراوی فەرمی: وەزارەتی دەرەوەی عێراق بڵاویکردەوە، فوئاد حوسێن، جێگری سەرۆکوەزیران و وەزیری دەرەوە لە بەغدا پێشوازی لە رۆبن بریکلمانس، وەزیری بەرگریی هۆڵەندا کردووە، لە کۆبوونەوەکەشدا هەماهەنگی لە بوارەکانی سەربازیی و ڕووبەڕووبوونەوەی تیرۆر تاوتوێ کراون، هەردوولا جەختیشیان کردووەتەوە لەسەر ئەوەی نابێت دەرفەت بە تیرۆر بدرێت دۆخی ئێستای سووریا بقۆزێتەوە.

 

زانیاریی زیاتر: فوئاد حوسێن ئەوەشی خستووەتەڕوو، گرنگە هەماهەنگی لەنێوان وڵاتان هەبێت و کۆمەڵگەی نێودەوڵەتیش ڕۆڵێکی کارا بۆ پشتیوانی سووریا بگێڕێت، کە لە چەند ساڵی ڕابردوودا ڕووبەڕووی نەهامەتی زۆر بووەنەتەوە.