ئەمساڵ لە عێراق 873 كەس بەهۆی ڕووداوەکانی هاتووچۆوە گیانیان لەدەستداوە

ئاڤا نیوز

 

بەڕێوەبەرایەتیی گشتیی هاتووچۆی عێراق ئاماری ڕووداوەکان و قوربانییانی هاتووچۆی لە ساڵی 2024دا بڵاوکردەوە و ڕایگەیاند، زیاتر لە سێ ملیۆن سەرپێچیی هاتووچۆ لە سەرجەم پارێزگاكان تۆماركراوە و نزیکەی پێنج هەزار ڕووداوی  هاتووچۆش ڕوویانداوە.

 

وێنە گەورەكە: بەڕێوەبەرایەتیی گشتیی هاتووچۆ سەر بە وەزارەتی ناوخۆی عێراق گرنگترین ئامار و داتاكانی ساڵی 2024ـی ڕاگەیاند، بەپێی داتاکان ڕێژەی سەرپێچی و ڕووداوەكانی هاتووچۆ بەراورد بە ساڵی ڕابردوو كەمیانكردووە.

 

ڕاگەیێنراوی فەرمی: بەڕێوەبەرایەتیی هاتووچۆی گشتی عێراق ڕایدەگەیەنێت:

• ئەمساڵ چوار هەزار و 948 ڕووداوی هاتووچۆ لە سەرانسەری عێراق تۆماركراون كە بەراورد بە ساڵی ڕابردوو بەڕێژەی 30% ڕووداوەکان كەمبوونەتەوە.
•  بەهۆی ڕووداوەکانەوە 873 کەس گیانییان لەدەستداوە، بەراورد بە 2023 37%ی قوربانییەکان کەمترن
• سێ ملیۆن و 163 هەزار و 247 سەرپێچی تۆمارکراون، ئەمیشیان بەراورد بە ساڵی ڕابردوو ڕێژەکەی 17% کەمی کردووە.

 

هاتووچۆی عێراق ڕاشیگەیاند، ئەمساڵ ملیۆنێك و 328 هەزار و 974 تابلۆی نوێی ئۆتۆمبێلیان بە شۆفێران داوە، داهاتی بەڕێوەبەرایەتییەكانی هاتووچۆی پارێزگاكانی عێراقیش لە پارەی ڕسومات و پێبژاردنی سەرپێچییەكان، 486 ملیار دینار بووە.