ئەندامێكی سەركردایەتیی یەكێتی: دوای سەری ساڵ کۆبوونەوەکان بۆ پێکهێنانی حکومەت چڕ دەبنەوە

ئاڤا نیوز

 

چاوەڕوان دەكرێت دوای سەری ساڵ هەنگاوەکانی پێکهێنانی کابینەی نوێی حکومەتی هەرێمی کوردستان خێراتر بكرێن و ئەندامێکی ئەنجوومەنی سەرکردایەتیی یەکێتیش لەمبارەیەوە دەڵێت، "دۆخی ناوچەکە وا دەخوازێت کابینەی نوێ زوو پێکبهێنرێت".

 

وێنە گەورەكە: بۆ پێكهێنانی كابینەی 10ـی حكومەتی هەرێمی كوردستان لایەنە سیاسییەكان دەستیان بە گفتوگۆ كردووە و پارتی و یەكێتیش وەك دوو لایەنی سەرەكیی پێكهێنانی كابینەكە چەند كۆبوونەوەیەكیان كردووە، بەڵام هاتنی سەری ساڵ كۆبوونەوەكانی سست كردووە و چاوەڕوان دەكرێت دوای سەری ساڵ هەنگاوەكان خێراتر بن.

 

لێدوانی فەرمی: پۆڵا سیروان تاڵەبانی، ئەندامی ئەنجوومەنی سەرکردایەتی یەکێتی نیشتمانی کوردستان بە ئاڤا میدیای ڕاگەیاند: دوای سەری ساڵی نوێ گفتوگۆ و کۆبوونەوەکان بۆ پێکهێنانی کابینەی 10 چڕتر دەبنەوە، کۆبوونەوەکانی پێشتریش ئەرێنی بوون و گفتوگۆی باش کراوە، بۆیە لە کۆبوونەوەی داهاتوو دێنە سەر وردەکارییەکان و دەست بە هەنگاوی کردەیی دەکرێت.

 

ئەندامەکەی ئەنجوومەنی سەرکردایەتی یەکێتی گوتیشی: دۆخی ناوچەکە وا دەخوازێت هەنگاوەکانی پێکهێنانی حکومەت خێراتر بکرێت، پێویستە کورد ناو ماڵی خۆی کۆبکاتەوە و لایەنە سیاسییەکان بە پڕۆژەی نیشتمانیی و هەڵوێستی هاوبەش بێنە پێش، بۆ ئەوەی لەو ئاڵانگاری و ڕووداوانەی دێنە پێش پێکەوەبن و بتوانن داکۆکی لە مافی خەڵک بکەن.

 

ئەوەی پێویستە بیزانیت: "ئەو گۆڕانکارییانەی لە سووریا و ناوچەکە ڕوویانداوە، بۆ ساڵی داهاتوو بێگومان ڕەنگدانەوەی لەسەر دۆخی عێراق دەبێت". پۆڵا سیروان  تاڵەبانی وای گوت.