219 هەزار فەرمانبەر لەڕێگەی هەژماری من مووچەکانیان وەردەگرن

ئاڤا نیوز

 

ڕۆژە یەکشەممە دەست بە دابەشکردنی مووچەی مانگی 11 دەکرێت و بەشێک لە مووچەخۆرانیش لە ڕێگەی هەژماری من مووچەکانیان وەردەگرن.

 
وێنە گەورەکە: بە ئامانجی هێنانەکایەی ئاسانکاریی زیاتر بۆ هاووڵاتییانی هەرێمی کوردستان، حکومەت بەردەوامە لە پتەوکردنی ژێرخانی بە دیجتاڵیکردن و لەو چوارچێوەیەشدا دەیەوێت سەرجەم مووچەخۆران لە ڕێگەی هەژماری منەوە مووچەکانیان وەربگرن و تا ئێستا پڕۆسەکە بە سەرکەوتووانە بەردەوامە.

 
لێدوانی فەرمی: سەرچاوەیەک لە تیمی هەژماری من بە ئاڤا نیوزی ڕاگەیاند: لە دابەشکردنی مووچەی مانگی 11ی مووچەخۆرانی هەرێمی کوردستان، 219 هەزار مووچەخۆر لەڕێگەی هەژماری من مووچەکانیان وەردەگرن.

 
زانیاریی زیاتر: بەپێی دوایین داتای تیمی هەژماری من، 37 هەزار و 500 پێشمەرگە، هاوکات 181 هەزار و 830 فەرمانبەری مەدەنی کە 65 هەزار و 350یان مامۆستان، لەڕێگەی هەژمارەکەوە مووچەکانیان وەردەگرن.

 
ئەوەی پێویستە بیزانیت: زیاتر لە 550 ئامێری ATM لە زیاتر لە 200 شوێنی جیاواز لە هەرێمی کوردستان دانراون، هاوکات 720 هەزار فەرمانبەر خۆیان لە نێو پرۆژەکە تۆمارکردووە و 350 هەزار کارت دابەشکراون.

 

ئەمەش بزانە: فەرمانبەرانی وەزارەتی پەروەردە کە خاوەنی هەژمار منن، دەتوانن پێش وادەی دابەشکردنی مووچەی وەزارەتەکەیان مووچەکانیان لەڕێگەی هەژمارەکەوە وەربگرن.