حەماس ڕەزامەندنی لەسەر ئاڵوگۆڕکردن بە 34 بارمتە دەدات

ئاڤا نیوز

 

بزووتنەوەی حەماس ڕازیبوونی خۆی بە پەسەندکردنی ئەو لیستە 34 بارمتەیە نیشانداوە کە لەلایەن ئیسرائیلەوە پێشکەشی کراوە بۆ گەیشتن بە ئاگربەست لە غەززە.

 

وێنە گەورەکە: ڕۆژی 3ـی کانوونی دووەمی 2025، شاندی دانوستانکاری ئیسرائیل و حەماس لە دەوحە بەشدارییان لە گەڕێکی دیکەی گفتوگۆکانی ئاگربەستی شەڕ و ئازادکردنی بارمتە ڕفێندراوەکانی 7ی ئۆکتۆبەری 2023 کرد، کە ژمارەیەکیان هێشتا لەبن دەستی چەکدارانی حەماسدا ماون.

 

زانیاریی بەدەستهاتوو: بەگوێرەی ئاژانسی ڕۆیتەرز، بەرپرسێکی بزووتنەوەی حەماس ڕایگەیاندووە، "ئێمە ڕێککەوتین لەسەر لیستی 34 بارمتە کە لەلایەن ئیسرائیلەوە پێشکەشکراوە بۆ ئەوەی لە ڕێککەوتنی ئاگربەستدا بە دیل بگۆڕدرێنەوە".

 

زانیاریی زیاتر: ئەو بەرپرسە ئەوەشی گوتووە، "هەر ڕێککەوتنێک بەندە بە پەسەندکردنی کشانەوە و ئاگربەست لە غەززە"، ئاماژەی بەوەشکردووە، "بزووتنەوەکە بە دەمەوە هاتنێک لەلایەن ئیسرائیلەوە نابینێت سەبارەت بە کشانەوە لە غەززە یان ڕێککەوتنی ئاگربەست".

 

ئەوەی پێویستە بیزانیت: بزووتنەوەی حەماس، لە 7ـی ئۆکتۆبەری 2023، هێرشی کردە سەر باشووری ئیسرائیل و جگە لە کوژران و برینداربوونی سەدان هاووڵاتیی سڤیل و سەربازی ئیسرائیل، 251 هاووڵاتیی ئیسرائیل و بیانییان بە بارمتە گرت.