سێ وڵات هۆشداریی بە ئیدارەی نوێی سووریا دەدەن

ئاڤا نیوز

 

هەر یەکە لە وڵاتانی ئەمریکا و فەڕەنسا و ئەڵمانیا هۆشداریی بە ئیدارەی نوێی سووریا دەدەن، سەبارەت بەو پۆستە سەربازییانەی دراونەتە چەکدارانی بیانی لە ڕیزیی هێزی سەربازی ئەو وڵاتەدا.

 

وێنە گەورەکە: بە گوێرەی زانیاریی ئاژانسی هەواڵی ڕۆیتەرز، لەنێو 50 پۆستی باڵای سەربازی سووریا، شەش پۆستیان دراوەتە چەکداری بیانی نێو ڕیزەکانی تەحریروالشام لەوانە:- ئیغوری،چینی ،تورک ، میسری و ئوردنی، هاوکات پله سەربازییەکانیشیان لەنێوان عەمید بۆ عەقیدە.

 

ڕاگەیێنراوی فەرمی: ئاژانسی ڕۆیتەرز لە زاری دوو سەرچاوەی ئاگادارەوە بڵاویکردووەتەوە، ئەو هۆشدارییە لە چوارچێوەی هەوڵەکانی ڕۆژئاوا دێت بۆ پێداچوونەوە بە دووبارە بوونیادنەوە و دابەشکردنی بەرپرسیارییەتی سەربازی لەو وڵاتە.
 
ڕۆیتەرز ئاماژەی بەوەشکردووە، لە دیدارەکانی ئەم دواییەی نێردەی وڵاتانی ئەمریکا و فەڕەنسا و ئەڵمانیا و کۆبوونەوەکانیان لەگەڵ ئەحمەد شەرع، بەرپرسی ئیدارەی نوێی سووریا بەڕوونی باسی ئەم بابەتە کراوە.